大陸最鍾意做真人騷節目，幾乎所有題材都搵到藝人參加演出。
上年一度傳出廣電總局將禁止未成年嘅人參與真人騷拍攝，令大陸製作節目題材受限，尤其係主打親子嘅《爸爸去哪兒》大受影響。不過上年尾成功翻生，播出《爸爸去哪兒4》。受歡迎梗係要encore啦，《爸爸去哪兒5》完成得七七八八，第一集安排喺下星期四（7號）播出，新一輯仲有陳小春同老婆應采兒，以及佢哋以往悉心保護嘅4歲仔Jasper都有粉墨登場。【新聞連結： http://bit.ly/2xsLoiL 】
中共十九大會議提前於下月18日喺北京舉行，為咗整頓一下風氣，湖南省委巡視組提交報告指湖南衛視長期以「娛樂立台」、「以收視論英雄」嘅思想根深蒂固，對處理社會、經濟效益問題左右搖擺，做為黨嘅「喉舌」，價值取向有偏差，問題出於對節目把關不嚴。
至於報告認為，《爸爸》為咗吸引觀眾，過度消費明星、明星子女，不利青少年健康成長，被國家廣電總局叫停。另外報告仲指責電視台用字低俗、嘉賓衣着暴露，鏡頭挑逗等等。
而湖南衛視為咗回應呢啲指控，提出停播相關有問題嘅節目，首當其衝嘅係《爸爸5》，所以湖南衛視答應今年內唔會播出《爸爸5》。不過，睇番《爸爸去哪兒》或者係湖南衛視嘅官方微博，都未有公佈節目調動消息，甚至連日都有轉發參與拍攝嘅藝人消息，落足力宣傳節目。
《蘋果》昨嘗試聯絡小春，但小春於截稿前未有回覆。
|
鍾意就快D Share啦！
|
|
|
