港姐愛得好高調
鄭嘉穎讚陳凱琳多優點
世界唔同，今時今日嘅港姐同以往港姐嘅風格都隨住時代變遷而改變，以往講求喺幕前要高貴大方得體，o依家嘅觀眾更加鍾意見到真性情，寧願你大癲大喪都好，只要你夠真，觀眾就會受落。
而喺戀愛方面，今時今日嘅港姐就相比起以往要高調大方得多，好似以下呢幾位近年參選過港姐嘅藝人咁，就全部都愛得高調，一啲都唔介意同大家分享拍拖嘅甜蜜。
黃心穎
2012年參選港姐得到亞軍嘅黃心穎，喺參選之後就加入大台工作成為藝人，雖然間中都有緋聞傳出，但係一路就冇乜明確目標，直至今年成功攻陷昔日偶像男神馬國明，兩人喺拍攝《On Call 36小時》嗰陣認識，之後有指心穎bb力追馬明，最終成功拍拖，最近喺大台直播節目更大耍花槍，夠晒sweet。
陳凱琳
2013年參選港姐以大熱姿態奪得冠軍嘅陳凱琳，加入大台之後好快就喺各個節目中以主持身份出現，之後仲轉戰電視劇拍埋戲，而同鄭嘉穎一齊拍《殭》嘅時候仲撻著埋，一段「父女戀」就咁誕生，雖然中間就傳出過分手傳聞，但係事後陳凱琳就澄清關係並冇變化依然相愛，而鄭嘉穎仲曾經喺一個訪問中大讚陳凱琳「優點多到講唔晒」。
歐陽巧瑩
同樣2013年參選港姐嘅歐陽巧瑩，雖然當初不幸落選，但係都成功加入大台成為藝人，近年拍攝嘅旅遊節目當中大騷身材，更加令佢彈出成為「女神」，而佢同「木偶哥」林師傑就真係愛得癡纏，兩人更加會一齊出席活動，亦都周不時喺社交網站曬恩愛，羨煞旁人。
龐卓欣
2015年參選港姐嘅龐卓欣，得到亞軍之後就冇加入大台，反而自己一個出嚟做Youtuber，實行自己話事，嚟自豪門嘅佢男友都有返咁上下份量，不過佢哋都相當貼地，更加會成日喺社交網站曬恩愛，兩人拍拖冇耐就已經見晒家長，感情非常穩定。
馮盈盈
2016年港姐冠軍馮盈盈，係未參選之前其實已經從事緊模特兒等嘅工作，當時佢就表示自己從未拍過拖，而喺參選時佢就表示已經有一位醫生男友，對方更支持佢參選，男方更加喺社交網站貼上咀額相確立女友地位。
|
鍾意就快D Share啦！
|
|
|
