34歲嘅王浩信去年拍《EU超時任務》彈起，今年仲先後拍《不懂撒嬌的女人》同《踩過界》，而佢喺劇中大多都係飾演暖男角色，形象正面到爆。而喺現實中佢11年早早就封盤結婚，同當時大台小花陳自瑤奉女成婚，而人夫同好爸爸形象亦幫佢成為新一代「師奶殺手」。
不過最近屢傳王浩信嘅婚姻亮起紅燈，「蛛絲馬跡」包括兩公婆由經常互貼sweet相到漸漸「冇互動」，甚至老婆同阿女嘅合照，王浩信亦未有俾「like」支持。
事後王浩信馬上澄清造只係太忙冇俾like，之後仲「跟得好足」，陳自瑤每次post相，王浩信都好似收到訊號咁，馬上俾like。至於之前不時兩公婆晒恩愛嘅post已經絕跡，反而不時post陪阿女嘅相，「慈父」形象GET！
即使係咁，王浩信分居傳聞亦甚囂塵上，不少同事都有聽聞，昨日更有傳媒報道指，王浩信已搬出日出康城愛巢，與細佬同住維景灣畔，更指兩公婆出現問題原因係地位「男尊女卑」，喺再添丁問題上出現分歧。
《蘋果》收到消息指兩人分居，但女方缺乏獨立經濟能力，故關係一直膠著；但關係生變原因唔係生仔，而係王浩信嘅異性緣太勁，令一直啞忍嘅陳自瑤，最後亦忍無可忍。
其實由婚前到婚後，王浩信媾女傳聞一直不絕，喺婚前有傳偷食Cammi，而近年喺大台走紅後，每次拍劇都會與同劇嘅女拍檔表現曖昧。
而最近播映緊嘅《踩過界》，開拍時有指「癲姐」蔡思貝同張振朗因為拍劇而撻著傳緋聞，不過有指「真命天子」另有其人。另外，又有傳雖然《踩過界》一劇早已拍完，不過王浩信仍主動約女拍檔食飯聚舊，甚至某次仲開埋VIP房約女演員去火鍋店食飯，甚至更二人孤男寡女獨處。至於係邊位女演員，應該唔難估
依家係無綫力捧小生嘅王浩信，當然有嘢想講，不過依家唔講住。佢噚日回覆傳媒稱，日內會出席公開活動，到時一次過交代。係咪交代「唔好嘅消息」？佢又話唔係喎。
|
鍾意就快D Share啦！
|
|
|
