冇錯！又係今屆港姐冠軍雷莊（Juliette）出場，今次唔關佢嘅尊容事，而係佢用嘅法國品牌Longchamp手袋，被《蘋果》讀者質疑係假貨呀呀呀！話 ...
冇錯！又係今屆港姐冠軍雷莊（Juliette）出場，今次唔關佢嘅尊容事，而係佢用嘅法國品牌Longchamp手袋，被《蘋果》讀者質疑係假貨呀呀呀！
話說日前Juliette化行妝去中環參加關之琳生日飯局，搭港鐵嘅時候被讀者鄭小姐「爆相爆片」，呢單即時新聞出咗之後，有眼利讀者發現，Juliette所用嘅綠色Longchamp手袋疑似係假貨，留言：「Omg佢個longchamp袋係假貨」，其他讀者睇到都起哄：「我都覺得似假！無logo的」，仲有讀者話：「佢老豆唔係有錢人咩？Longchamp都唔係好貴啫，都要用A貨？仲要去關之琳生日食飯，關之琳用慣正貨，一眼被人睇穿咪瘀爆囉！」
呢個Longchamp手袋價值唔使1千蚊，貴為港姐冠軍嘅Juliette，爸爸雷葆文係香港十大傑出設計師，名下物業同公司曾遍佈中、港、加國，身家逾億億聲，不過08年金融海嘯令佢一舖清袋，唔單止物業要蝕讓，甚至曾經試過被追5萬元欠租，仲有銀行欠債20幾萬。
當時喺加拿大讀緊書嘅Juliette，仲要兼職做內衣模特兒，搵錢供自己讀大學，返嚟選港姐嘅時候，都係入住炮台山嘅平酒店，就算家貴為港姐冠軍，聽聞都係租住舊樓，只係表面風光而已！不過，斷估佢應該唔會用假貨手袋啩，唔知係咪角度、燈光嘅問題，令佢嗰個手袋上嘅名牌LOGO睇唔到呢？
召喚Juliette！快啲出嚟解釋下
