35歲嘅林子善今日與拍拖5年嘅圈外女友董佩欣（Kary）正式簽紙結婚，明年4月3日將於將軍澳一間酒店補擺50圍酒席，月尾會同太太去馬爾代夫影婚紗相。子善今日喺ig貼上張與老婆合照，留言﹕「20171016之上路，有儍人終成眷屬，一起踏上婚姻之路。」見子善被老婆勾住佢個鼻子走，似乎係喻意從此被困，聽晒老婆話。
子善今日接受傳媒訪問時，直言好攰：「拍TVB（《果欄中的江湖大嫂》）今朝04先收到，返到屋企沖埋涼，唞一陣9點就要起身簽紙，o依家都準備休息。(點解咁趕？)套劇遲咗成個月煞科，原本諗住拍多套大陸微電影，唉，o依家冇咗幾十萬。」
問到簽紙過程有冇感動落淚？佢笑笑口話：「我問可唔可以諗吓先呀？！」原來子善係一個好感性嘅人，好容易就喊，所以佢想搞吓氣氛，佢話：「我老婆就好快簽咗，但我驚我喊呀，我喊阿爸阿媽又喊，阿哥又喊，阿嫂又喊，唔想搞到氣氛咁，所以咪搞笑囉。(對老婆有乜承諾？)冇喎，都係嗰啲啦，生仔就出年先，擺埋酒先計劃。想搬層大啲嘅樓，最好同父母一齊住，或住附近，但九龍樓好貴，都要努力跑數。」
子善早前買咗一隻20萬元嘅鑽戒向女友求婚，佢話預計整個婚禮使百幾萬，佢話：「擺酒都70萬啦，仲有外家禮金呢，呢啲出手一定要闊綽，屋企人嘛，寧願慳自己。」
| 林子善今日迎娶拍拖5年嘅圈外女友Kary，兩人都好玩得，連簽紙都照玩！ | | |
| | |
來源 source: http://hk.apple.nextmedia.com
|
鍾意就快D Share啦！
|
|
|
