謝婷婷笑言希望可以勸服81歲父親謝賢，父女二人齊齊裝平安鐘。
藝人謝婷婷出席鞋履品牌活動時透露，有荷里活監製邀請她成為電影監製：「佢覺得我嘅idea幾好，係一套動作喜劇，但十劃都未有一撇。（會唔會做埋演員？）未知。（覺得有冇能力做監製？）做監製責任好大，我都唔係咁清楚，我只係想畀idea。」
提到最近有荷里活監製Harvey爆出性醜聞，婷婷自言好彩，從未遇到類似事件：「如果我單獨去見一個男監製。我會着得保守同密實啲，而且我會畀佢感覺到我嘅態度係好強硬同獨立。（如果畀個奧斯卡獎作利誘，肯唔肯？）緊係唔制，攞獎要有能力，畀個獎我又要付出自己，咁蝕。（叫人陪你一齊見監製？）唔使，我想畀人覺得我係獨立而且可以揸到主意。（家人有冇提點你？）冇，佢哋提都冇提。」
安志杰係個好男仔
至於前男友安志杰日前與Jessica C.舉行婚禮，婷婷表示不知情，還問：「係咩？我明顯冇睇新聞。（會唔會傳短訊畀佢？）會！多謝提醒，恭喜晒佢，會祝福佢。（送咩禮物？）送上我嘅祝福。（羨慕佢？）好戥佢開心，佢係個好男仔，佢哋好襯。（你走寶？）我都係個好女仔，Sean（前男友戴尚安）都係個好男仔，我會付出時間一齊嘅都係好男仔，只不覺大家唔夾，唔代表佢唔值得同另一個一齊。（唔心急結婚？）每個人對幸福嘅定義都唔同，我覺得自己都好幸福，對我嚟講唔一定要結婚生仔先幸福。」
可能遺傳咗唔熄火
另外，談到81歲的父親謝賢早前自爆曾三次忘記熄火而險釀火災，婷婷表示知情：「個天花板搞到黑晒，不過我都試過兩次，有次瞓着咗七個鐘都冇熄火，第二日入廚房發覺好熱，好在冇發生意外，可能係遺傳。（擔唔擔心爸爸？）都擔心，所以遊說咗佢裝平安鐘。（佢好抗拒？）因為佢好獨立，又或者佢想人『鵝』吓佢，其實我自己都想要個平安鐘。（陪爸爸一齊住？）我有問過，佢唔肯。」
來源 source: http://hk.on.cc
|
鍾意就快D Share啦！
|
|
|
