本月15日是鄧麗欣（Stephy）34歲生日，剛自韓國釜山趕返港的她，和好姊妹吳雨霏（Kary）、區文詩（Angela）在中環開P補祝生日，但就不見跟Stephy和Angela屬好友，但傳跟Kary反目的楊愛瑾（Miki）在場，令人惴測Miki和Kary依然有心病。而日前Kary在活動上表示將和Stephy慶生，但會否叫Miki出席就不知，因她不是派對的統籌。
Angela接受東網訪問時，亦說不是她做統籌，至於可有叫Miki赴會，她咿咿哦哦：「普通食飯之嘛。（點解唔叫埋Miki？）er…唔知喎，唔係我統籌㗎喎，其實冇乜話約唔約邊個嘅，邊個得閒咪邊個食囉，其實都好難約呀，尋日爭啲都取消，真係一波九折，因為Stephy班機喺釜山delay嘛，有次突然間有個要做嘢，有個突然要飛，跟住原來Kary好似又唔得，因為佢第二日又早機，又唔舒服，本身好似唔係可以食到嘅，後尾Stephy有另一班機返到嚟，咁咪點都食啦。（Miki唔到好失望？）其實…大把機會啦，大家成日食飯㗎啦，我成日都見到Miki，大家都冇嘢嘅。（冇叫Miki可怕她不開心？）其實冇漏唔漏叫邊個嘅，只不過邊個得閒，邊個嚟食飯囉，（你知唔知有冇約佢？）其實大家太敏感啦，以前間唔中都係咁嘅啦，間唔中我哋三個，間唔中佢哋三個，成日都變嘅。（Miki忙湊仔？）佢好忙呀，湊仔係。（所以冇叫？）其實冇話叫唔叫嘅，食飯呢啲嘢，邊個得閒邊個嚟，原本Kary嚟唔到，可能得我同佢添。」
Miki指有約Stephy食飯
問可有送禮物給Stephy？她說不愛送禮，但每年會訂造一個有心思的生日蛋糕給好友，今年就送了一個有紅唇的蛋糕，她說：「大家都識咗咁多年，乜都有啦，唔使刻意買，咁多年嚟都係食飯，送蛋糕，我哋有好多共同朋友，唔只喺呢一班，所以每年生日都食好多餐飯，如我生日，Stephy可能會同我食四、五餐飯，係唔同朋友，近年大家唔搞party啦，寧願安安靜靜食餐飯，大家傾吓偈。（有咩祝福畀Stephy？）好老土，依家年紀大咗，祝佢健康囉。（想佢快啲拍拖？）呢啲嘢唔輪到你話，就算我祝福佢，佢都唔會因為咁而快啲拍㗎嘛，寧缺莫濫，最緊要搵到個啱嘅。（可有介紹男仔給好友識？）唔…，唔使啦，哈哈哈…。（佢有新男友？）唔…係，我哋唔興做呢啲嘢。」」而Angela就話已非圈中人不願透露近況，只說忙做飲食生意。至於在北京的Kary則表示不作回應。至於傳與吳雨霏不和的楊愛瑾（Miki）就透過電話回覆記者：「我都約咗Stephy食飯㗎啦，見到佢最近工作成績都好理想，我替佢自豪，其他是非我唔知呀。」
|
鍾意就快D Share啦！
|
|
|
