【更新動新聞】
康健國際醫療（3886）停牌後，股東「玩具大王」蔡志明向本報表示，對康健國際事件感到頭痛，並劃清界線，指自己一直甚少過問公司業務；女兒蔡加怡雖然擔任康健主席，但一至兩星期才過去一次，主要視察診所業務，沒有參與股票交易。
蔡志明表示，康健出事後曾詢問曹貴子，對方稱，證監會就新銳醫藥（6108）與康健之間的股票交易提出疑問，「佢解釋咗都唔滿意，變咗宜家停牌。」
提到2005年蔡志明為何入股，他指兩人曾於沙田活動見過面，當時曾到曹貴子診所看病，對方取出與長和（001）主席李嘉誠的合照，表示股東之一的李嘉誠「等錢使」有意退出，問蔡志明可否接貨，蔡見診所有錢賺便答應。入股後，曹貴子又提出由蔡志明子女做主席，當時稱「你哋做實業，上市公司做落去形象好。」然而，他指女兒上任一、兩年後，即呻做得不開心，因股價波動，有小股東投訴買入後大蝕。
事到如今，蔡志明坦言，「我淨係覺得佢唔應該呃我囉，淨係用我個名。」朋友告訴他，曹貴子在外稱蔡為拍檔，聲稱「蔡生大把錢照住」。「大佬，拍檔淨係隻康健咋嘛。其他嗰邊幾廿隻，我一隻都唔知，咁點樣叫拍檔姐？」他又透露，未出事前，曹貴子曾向他借錢，現已杳無蹤影，「我宜家搵佢攞息都搵佢唔到」。
問到會否退出康健，他表示待復牌後再考慮，「我睇佢呢單嘢都係玩完，因為太大。」他表示，事件仍待證監會調查，「如果入面真係有人犯咗錯，都要同股東攞個公平。」
記者：卓茗
蘋果財經，關心你飯碗
http://fb.com/appledailyatm
|
鍾意就快D Share啦！
|
|
|
