英超今個周日認真爆呀，有兩場大戰等住大家。睇完熱刺對水晶宮Warm up之後，就嚟曼城主場鬥阿仙奴！曼城開季至今10戰仍未嘗一敗，對住兵工廠可唔可以延續佳績，梗係要睇到尾啦。城廠戰之後仲有車曼大激鬥，車路士領隊干地被傳帥位岌岌可危，曼聯主帥莫連奴會唔會送佢一程？今晚咁多嘢睇，你又點可以錯過呀！？
【02:21】【全場完】車路士 1:0 曼聯
車魔大戰勁緊湊，全場快鬥快高手過招，最終車仔憑將士用命，以及王牌前鋒莫拉達一頭頂定江山，以1:0力克紅魔鬼。紅魔今仗冇泊大巴，寸王出齊拉舒福特、盧卡古同米希達利恩打正選，盧卡古上半場亦有埋門，但就過唔到泰拔高圖爾斯。車仔為追前列位置，表現極為肉緊，開賽初段曾慘食詐胡，另外夏薩特遠射亦好有威脅，但迪基亞力守大門，半場雙方冇紀錄。換邊後兩軍加快節奏，55分鐘艾斯派古達右路傳中，莫拉達中路走位頭槌頂入網仔，車仔憑呢個超靚入球打開紀錄。之後寸王換入費蘭尼、馬迪爾及連格加強攻力，於球賽尾段福仔勁射柱邊出界，爆炸頭於禁區近射又過唔到高圖爾斯，福仔完場前罰球又省到人高出，紅魔力戰輸0:1。寸王於上季帶領曼聯後，於英超及英足盃作客鬥車路士、曼城、阿仙奴、利物浦及熱刺未贏過，連埋今場敗仗，僅得3和5負劣績。
【01:49】
62分鐘曼聯換人，換走米希達利恩及菲爾鍾斯，換入安東尼馬迪爾及費蘭尼，同車仔死過
【01:41】車路士 1:0 曼聯
55分鐘車仔入波！艾斯派古達右路大腳斬中，莫拉達頂入超靚遠距離頭槌，車仔1:0！
【01:34】
49分鐘，莫拉達禁區外第一時間抽射，唔中龍
【01:16】【上半場完】車路士 0:0 曼聯
車路士大戰曼聯，車仔有主場之利，當然比對手更加肉緊，可惜於開賽早段慘食詐胡，夏薩特一個超靚遠射，又過唔到迪基亞。比起之前作客利物浦，莫連奴今仗明顯冇咁保守，盧卡古有個靚埋門，但畀古圖爾斯救出，上半場冇入波，但雙方勁落力戰情緊湊，睇吓下半場有冇波入。
【01:10】
車仔守衞安達斯基斯坦臣，接應角球僅僅頂高
【00:50】
20分鐘，車仔泰莫爾巴卡約高侵犯菲爾鍾斯，攞咗張黃牌
【00:49】
夏薩特一腳勁射，好在迪基亞反應快救到，法比加斯近門執漏一頂頂中網側，慘呀！
【00:46】
盧卡古禁區頂攞到波，輕鬆轉身施射，高圖爾斯擋出
【00:42】
沙柏哥斯達右路傳中，莫拉達同紅魔守將齊齊大漏，巴卡約高冇人睇住，竟然一腳射高！
【00:38】
曼聯大難不死，差啲就搞掂車仔，可惜拉舒福特無人看管下頂高咗，冇辦法先開紀錄
【00:37】
車路士開波6分鐘食詐胡，菲爾鍾斯擺老烏，但係球證吹罰莫拉達推人在先
【00:20】車路士 對 曼聯
曼城主場爆廠之後，車路士對曼聯跟住開戰！干地今仗唔衰得，寸王就想用王者曼打車仔一巴，兩邊都係超強陣，究竟邊隊會笑到最後？繼續追實【英超Live】
車路士正選陣容
門將：13泰拔高圖爾斯
後衞：28艾斯派古達、27安達斯基斯坦臣、24加利卡希爾
中場：21沙柏哥斯達、7尼高路簡迪、14泰莫爾巴卡約高、3馬高斯阿朗素
攻中：4法比加斯
前鋒：9艾華路莫拉達、10夏薩特
曼聯正選陣容
門將：1迪基亞
後衞：3艾歷拜利、12基斯史摩寧、4菲爾鍾斯
中場：25路爾斯華倫西亞、21安達靴里拉、31尼曼查馬迪、18艾舒利楊格
攻中：22米希達利恩
前鋒：9盧卡古、19拉舒福特
【00:10】曼城 3:1 阿仙奴 全場完
曼城最終以3:1擊敗阿仙奴，全取3分繼續做1哥。阿仙奴今仗踢起上嚟好似唔多上力，上半場A山一個撐場超辛苦，換邊之後換咗拿卡錫迪先追近比數。可惜，曼城74分鐘嘅入球，大衞施華越位在先冇吹到，呢個入波令到槍手洩晒氣，最終只能輸波而回
【23:47】曼城 3:1 阿仙奴
加比爾接應大衞施華傳送入波，但係施華越位在先，旁證竟然睇唔到，呢球阿記真係輸得唔抵呀！
【23:41】
捷西斯加比爾入替阿古路之後都有機會，接應角球近射，施治神救擋出
【23:37】曼城 2:1 阿仙奴
拿卡錫迪後備入替果然有料到，射穿摩拉斯大細為兵工廠追番粒，連雲格都直豎姆指！
【23:27】
伊禾比遠射勁就夠勁，但係角度太正。點知摩拉斯雙槌打高咗個波，接番個波之後畀博執漏嘅藍斯成份推入網。球證吹罰藍斯，唔係摩拉斯有排畀人笑
【23:21】曼城 2:0 阿仙奴
史達寧接應隊友靚爆過頭笠，畀蒙利爾一挨成份跌，球證即吹12碼。阿古路射中右柱彈入
【23:03】曼城 1:0 阿仙奴 半場完
曼城憑住迪布尼嘅靚波，半場以1:0領先。阿仙奴唔係冇攻勢，但係奧斯爾隱形，前線攻勢要靠晒A山，呢位智利國腳亦見獨力難支，睇嚟雲格半場要做啲嘢，唔係暴龍哥又出嚟嘈呀！
【23:02】
藍斯殺入禁區柺兩步，突然射近柱，艾達臣夠晒集中，擋出死神嘅射門
【22:50】
迪布尼一個直線送史達寧一程，呢位英格蘭國腳殺入禁區，諗住橫傳畀辛尼，點知唔畀好過畀，250傳到離行離列，辛尼當堂呆咗，哥迪奧拿灰到撻番落張凳
【22:34】曼城 1:0 阿仙奴
迪布尼禁區頂同隊友造個撞牆，推入禁區畀4個客隊球員圍住照起腳射入，施治飛盡都救唔到！
【22:25】
辛尼沉底傳中，可惜隊友叉錯腳，波皮都掂唔到
【22:17】
曼城一開波即時有個好機會，阿仙奴角球攻勢冇料到，主隊快翼史達寧一截到個波即時快放，交畀迪布尼之後，呢位比利時中場再交畀阿古路，後者窄位勁射高出
【21:55】曼城 對 阿仙奴
城廠戰即將上演！曼城今仗陣容冇乜大變，阿仙奴方面，領隊雲格都係精銳盡出，A山、奧燒齊齊有份，企圖用最大程度「輸出」破曼城不敗金身！
曼城正選陣容
門將：31艾達臣摩拉斯
後衞：2基爾獲加、5史東斯、30奧達文迪、18戴爾夫
中場：17奇雲迪布尼、25費蘭甸奴、21大衞施華
前鋒：7史達寧、10阿古路、19利萊辛尼
阿仙奴正選陣容
門將：33施治
後衞：24比利連、6哥斯尼、18蒙利爾、31哥拉辛拿斯
防中：34高基連、29格列沙加
中場：8艾朗藍斯、11奧斯爾、17伊禾比
前鋒：7阿歷斯山齊士
【21:52】熱刺 1:0 水晶宮 全場完
換邊後戰況確係唔一樣！雙方超進取，水晶宮入唔到真係冇運，熱刺可以全取3分，要多謝入球功臣Sonny之外，仲要多謝後備門神加沙寧加
【21:40】
孫仔半單刀射近柱唔中龍變大嘥鬼！之後再有單刀機會，呢位南韓國腳又要扭兩腳，最後又畀對手截到個波
【21:22】熱刺 1:0 水晶宮
水晶宮攻極都唔入，熱刺嚟料喇！主隊連番攻門不果，最後孫興民禁區頂左腳一Curl彎入！
【21:18】
水晶宮愈攻愈似樣，角球攻勢引發混戰，熱刺守將頭槌解圍失誤，米利禾積域近門一頂，又畀加沙寧加救出！
【21:15】
奧里亞短傳畀水晶宮截到，客隊即打突擊，沙夏接應隊友傳送，單對單面對加沙寧加射斜
【21:06】
水晶宮換邊後有次近磅嘅攻勢，唐辛殺入禁區起腳，熱刺門將救到，差啲就碌到入網！
【20:47】熱刺 0:0 水晶宮 半場完
熱刺喺周日英超頭場，主場對水晶宮，半場只可以用失敗嚟形容，攻門一啲威脅都冇。水晶宮今次擺明要1分，半場嚟講部署真係成功。希望換邊後會好睇啲
【20:35】熱刺 0:0 水晶宮
丹尼路斯於左路橫傳，哈利卡尼混戰中頂高，冇耐輪到客軍嘅史葛丹恩頭槌攻門，好彩第3號門神加沙寧加無瞌眼瞓撲出。
【20:31】熱刺 0:0 水晶宮
奧里亞右路傳中，可惜丹尼路斯頭槌頂到離行離列。
【20:09】熱刺 0:0 水晶宮
熱刺射手哈利卡尼遠射冇乜力，畀史巴朗尼輕鬆接實。
【20:00】熱刺 0:0 水晶宮
英超頭場倫敦打吡熱刺對水晶宮開波喇。
【19:40】
熱刺主場鬥水晶宮，為呢個Super Sunday打開序幕。熱刺周中歐聯KO皇家馬德里，氣勢超強，返到英超梗係要乘勝追擊啦，水晶宮贏完車路士聯賽開齋之後打回原形，要頂住熱刺真係唔易喎！
熱刺正選陣容
門將：22加沙寧加
後衞：24奧里亞、6達雲臣山齊士、5維頓漢、3丹尼路斯
防中：15艾歷迪亞、29哈利雲克斯
中場：17穆沙施素高、23基斯甸艾歷臣、7孫興民
前鋒：、10哈利卡尼
水晶宮正選陣容
門將：1史巴朗尼
後衞：2祖爾禾特、6史葛丹恩、24科素文沙、12馬馬度沙高、15舒洛比
中場：8羅夫度斯卓克、7卡比耶、4米利禾積域
前鋒：10安祖斯唐辛、11韋費特沙夏
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
