噚晚無綫《勁歌金曲》真係人氣最__嘅一屆（自己填），但周邊精采場面就多到笑到有腹肌，……以及大會嗰張「唔好問點解」嘅賽果——而全晚出現次數最多嘅名，係何——哲——圖。
依家，又要再提一次何哲圖個名，因為，噚晚星夢慶功宴上，佢爆咗木偶哥林師傑原來已向女友歐陽巧瑩求婚成功！恭喜晒呀！
其實早於本月中，木偶哥同歐陽巧瑩出席一個活動時，已透露婚期。當時兩人被問到點樣慶祝聖誕？男方就話有共識節日唔大事慶祝，因為想慳番啲錢儲錢買樓結婚。傳媒追問幾時結？木偶哥就話：「越快越好，搵到啱嘅人好難得！」又稱何哲圖都係催婚。
當眾求婚喎！傳媒起哄問歐陽巧瑩願唔願意啦，佢即刻話：「我願呀！」仲話唔需要浪漫求婚，因為會好驚同好尷尬。
時間又返番去噚晚星夢慶功宴上，um……一眾得獎以及尚在努力嘅歌手包括胡鴻鈞、何雁詩、鄭俊弘、木偶哥、谷微等等輪流向老闆何哲圖賣口乖講多謝，好開心加入星夢啦、多謝老闆多謝TVB啦。木偶哥話：「我真係要認真多謝老闆嘅，因為佢今年喺唔同層面都鼓勵咗我好多，俾好多信心我。」眾人就起哄嗌「結婚！結婚！」……你想像到個畫面係點啦……然後木偶哥隊番個咪俾何哲圖諗住由對方打完場，但何哲圖就爆咗句：「結婚呢樣嘢，已經同師傑溝通咗啦，我哋。」
跟住當然係大家又起哄木偶哥本來仲想兜話「係我同老闆結婚」，但何哲圖見大家咁高興，就爆料話木偶哥已經正式求咗婚喇。
開心事嚟嘅，「紅都面晒」嘅木偶哥呢個Moment亦開心share啦，佢話：「多謝晒…真係…依家正式宣佈係咪？我已經封咗盤，所以大家啦，盡情去妒忌歐陽巧瑩啦，羡慕佢你哋冇機會0架喇！因為我已經將個人留咗畀佢！哈哈！真係開心，因為老闆真係好關心我呢件事，俾咗我好大信心，我之前冇諗過婚姻，成日以為要搵好晒啲錢，買到樓，搞好晒先去做，係老闆畀咗個好大啟發我，都真係……仲幫我擇晒日，係好感動嘅成件事。」
多謝老闆，木偶哥都要多謝下未婚妻0架？「真係多謝……喺一個唔係咁靚嘅時候，遇到歐陽巧瑩入咗嚟我生命，同我拍拖啦，戇戇居居咁三年後，我哋依家準備籌備結婚啦，希望大家可以祝福我哋！多謝你哋支持！」咁幾時好日子？木偶哥話：「老闆幫我擇咗！」
點解何哲圖呢個老闆似老竇多啲……
更多娛聞，喺晒《娛果》
http://fb.com/appledailyent
【minigame】2017瘋暈人物 返工打機唔使擇日
http://bit.ly/2CeWQkP
|
鍾意就快D Share啦！
|
|
|
