亞視以App及OTT形式重生，焦點節目之一《百萬富翁》將由陳志雲任主持，今日陳志雲與曾華倩於亞視記招上公布《百萬富翁2018版》的詳情，陳志雲指這個節目在世界各地城市都有重新包裝推出，亞視當然也不會落後於人。至於究竟掟幾多錢出來？陳志雲表示：「唔使拎個篋出嚟晒Cash，已經準備好六千五萬現金，有本事可以每集可以攞走一百萬！」台上曾華倩與陳志雲談笑風生，曾華倩更對陳志雲件衫上的珠片有興趣，不時摸陳志偉胸上的珠片。
爆TVB當年唔做《百萬富翁》
之後，陳志雲接受媒體訪問，問到今次任主持的酬勞，他謂：「唔清楚，因為係電台幫我簽，冇問咁多，其實一個月前，聽到吳雨講呢個構思，當時都未正式搵我，我覺得呢個節目有幾個優點，延續性強，可觀看性高，係亞視經典嘅焦點節目，香港版就嚟廿周年，當佢哋正式搵我做節目，我真係受寵若驚，非常有興趣，呢個節目源於英國，原本係電台版，之後做咗電視節目，依家我做緊電台，然後又去主持電視版，感受好深，其實當年英國製作公司向無綫sell過呢個節目，但TB推咗，當時我喺無綫都未做到總經理級。（點解會推？）好多因素，因為TVB好少購買外國節目，因為自己可以做到，但當時我流晒口水。」
與陳啟泰主持同一個節目，陳志雲直言怕比較：「怕比較㗎，唔好比較啦，話我差，我會有抑鬱，大家主持風格不同，我嘅會多啲同觀眾互動，大家對陳啟泰主持嘅會有好深印象，完全贏係冇可能嘅，若果要扮佢，倒不如做自己，我會多啲了解觀眾啲。」
透過App報名參加
由於當年的《百萬富翁》節目差不多廿年之前，當時以一百萬做獎金，如今節目亦以一百萬做現金，會否敵不過通脹？他謂：「的確有通脹，但呢個節目嘅吸引點，唔係獎金，係大家嘅投入感同參與感，暫定做六十五集，頭一段時間做嘅會係慈善版，之後就係普羅大眾，大家可以透過App報名。」
避談酬金
再問陳志雲今次酬金高不高過當年做無綫總經理？他繼續避談：「真係唔知，亦唔怕無糧出，因為依家個個製作都係大投資。（如今幫亞視做節目，怕唔怕人哋話你倒戈？）唔好咁講，亞視重生對香港嚟講係好事，有競爭先有進步，大家共同努力。」對於網民不太睇好亞視重生，陳志雲表示：「可以理解，但最怕你唔講。（擔唔擔心TVB唔開心？）唔會，依家都只係用OTT形式播放，有競爭先有進步！（同你曾傳不和的梁思浩，今日都有嚟記招？）係咩？撞唔到喎，我同佢冇牙齒印。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
