久未在香港露面的藝人傅穎（Theresa）現身，與樂隊Supper Moment為戶外服裝品牌拍廣告。露腿示人的Theresa透露今次酬勞非常好，更表示對上一次在香港工作搵錢已是2016年的事，而她去年就忙於在內地拍劇，其中一套劇是與陳曉東（東東）飾演一對。講到東東之後會開演唱會，Theresa表示想去支持。問到可會做嘉賓？她笑言不知道，要問東東，而她之前亦有與對方及其太太一齊食飯。
上年同內地男友分手
Theresa又笑言其實她很喜歡做運動，只是外界一直以為她很文靜。問到平時可會與男朋友做運動？她表示：「以前真係少。」問到現時與男友可會少見面？她卻自爆原來已跟內地男友分手：「我依家係單身，上年分手，唔係最近，隔咗一段時間。我哋係和平分手，因為冇乜機會見面，依家都係朋友。（新一年想搵番個新男友 ？）新一年我想工作，依家唔係特別想拍拖。（因為佢hurt得你太深？ ）唔係，唔關事。大家到依家都可以心平氣和傾偈，只係少見面，性格都係問題，講好和平分開，而新一年都有唔同工作上嘅挑戰。」講到身邊很多姊妹已結婚嫁人，Theresa表示：「都好開心，我今日都收到我個best friend張相，就係佢男朋友同佢求婚，好戥佢開心。（你有冇酸溜溜？ ）點會？開心都嚟唔切，我冇所謂。有就有，冇就冇，有嘅話擋都擋唔住。」
唔知Stephy奪影后
而談及傳不和的前Cookies隊友鄧麗欣（Stephy）首奪「第二十四屆香港電影評論學會大獎」的「最佳女演員」，Theresa即表示：「係咩？好好呀！好開心，對演員嚟講係好希望得到大家認同，恭喜佢。」問到可會親自打給鄧麗欣講恭喜？她即尷尬笑言：「唔會啦，好耐冇打，你哋幫我寫咪得，恭喜佢。（趁機打破沉默？）你幫我寫就得，大家各自安好。（唔想同姊妹重修舊好？）唔好咁特登，有緣分嘅話遲早都會見面。」
出書唔寫姊妹情
她又透露今年會內地香港兩邊走工作，明年才出書，會寫關於這兩年工作的心路歷程。問到可會寫關於姊妹的事情？她笑言：「你又嚟？唔寫姊妹我都係幾有故事嘅人，可以寫好多嘢，應該叫佢哋寫育兒經。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
