現年51歲前小虎隊成員的林利接受東網訪問時，對於患上腸癌表現平淡及積極，透露做完三個多小時微創手術後，肚皮開了五個窿，肚臍上有四個傷口，而肚臍下的傷口較大，他形容：「好似女人生仔一樣，依家我好似女人生完BB坐月咁。」問到傷口又多又大可感痛楚？他說：「都會痛，但我都忍住唔食止痛藥，之前做完手術，醫生話可以打嗎啡止痛，我都只係打了一次，我盡量唔靠藥物。」
肚皮花咗仲有男人味
林利一向生活健康，早睡早起，飲食清淡，他家族成員亦沒有患癌，而今次患上腸癌第三期，他表示：「我覺得身體都勞損咗五十年，又大陸、台灣周圍跑，又應酬、拍嘢，食嘢，好多嘢積聚咗，你係唔知。（你食嘢都好清？）咁冇㗎，有啲人唔食煙都肺炎，唔飲酒都肝炎。依家做完手術，我啲抗體算係好勁，全身冇感染到，做手術後要注意飲食就冇問題，人情緒唔好，啲病就會嚟，政府叫啲人五十年要照大腸，真係好原因。因為我傷口都大，一個月表面可以康復，但內面幾時康復就會睇個人休息，肚皮花咗又唔會唔開心，可能更有男人味。個肚花咗可以當係一個記號，警剔自己要小心。」
淡定克制癌症
得知患癌可感害怕？篤信佛教的他表示：「又唔驚喎，對呢樣嘢好正面去睇，我知道後好平靜，工作照做，冇任何唔開心，自己安排好晒，到入院嗰刻先通知屋企人，包括我媽咪、細佬。（唔怕死？）唔驚喎，我對死呢樣嘢睇得幾開，maybe可能我唔出聲，好少接受訪問，可能啲人唔知我內心世界，我係一個好安然嘅人，心情唔會大起大落，我覺得有咁嘅事（病）係畀咗個訊息我，我要做一啲嘢，我三十幾年嚟，碰到挫折，遇到啲唔好嘅事，畀咗啲痛苦你，但其實你都會有啲得着。其實癌係好得意嘅，你愈驚，佢就愈嚴重，因為你心情唔好，因為抑鬱嘛，要真係唔怕，唔好只得把嘴講，要真係唔怕，個人要唔驚，咁佢會畀你克制住，我當呢個癌係個人仔喺我身上面，當我係一個生命，我要克制佢。」問腸癌三期是否好危險？林利表示：「佢個危險性好細微，我又唔係好專業，抽咗成身淋巴冇事就好安全，唔係代表唔會翻發，但依家冇。化療、電療都唔使，又唔使食藥。」但他打算稍後服食中藥，因現時虛不受補，且腸被切除了一部分，消化系統改變了，現時多去了廁所，打算休息到四月就開拍邵氏的30集劇集，期間會接受登台騷演唱。
第一個通知胡渭康
他又說出院三日後已擔任胡渭康及黎小田演唱會的嘉賓，但每次唱完後，傷口都會痛：「不過上台時就如有神助會唔記得晒，但一落台就痛，嗰日做小田嘉賓，一落台就開始傷口痛！（推咗佢哋？）唔得，一個係好兄弟，小田係恩師，點都要去，我咁多個月都冇同人講，咁唱幾隻歌啫，唔係咁難。」他又說得知患癌後，第一個通告的人是胡渭康，他說：「我打畀阿康同佢講，以前有乜恩恩怨怨算數，因為覺得兄弟，佢都默默畀咗好多鼓勵我，佢都好正面。」
|
鍾意就快D Share啦！
|
|
|
