掃呢頁CODE去手機

2018年3月1日 星期四

化腐朽為神奇 [壹週刊 - 1460 - 生活] __,M1,

鄭欣宜豪語錄化腐朽為神奇七年前,鄭欣宜正式登陸樂壇出唱片,11年做歌手,她當時已經歷過「白雪公主」事件、減一百磅壯舉等藝人的磨練階段,其間來回肥瘦之間 ...






鄭欣宜

豪語錄

化腐朽為神奇

七年前,鄭欣宜正式登陸樂壇出唱片, 11年做歌手,她當時已經歷過「白雪公主」事件、減一百磅壯舉等藝人的磨練階段,其間來回肥瘦之間,大受抨擊不用細表。

三年後,欣宜放下包袱終於找到合適自己的路線圖。

2014年 4月的一個深夜,她在臉書撰寫了一篇千字文,跟大家分享長時間跟減肥搏鬥,身心受盡煎熬的苦況,並宣布要為自己而活。這番心底話打動了不少人,有十萬人讚好支持。

欣宜首次演繹如何化腐朽為神奇。

交出真心, 180磅的欣宜一夜間成為真正女神。其後,代表作《女神》唱到街知巷聞,橫掃不少音樂獎項。去年紅館批了她在今年四月開個唱,卻在度假時發生意外弄斷了腳骨,要回港入院做手術,由開始隱瞞所有人,到演唱會開宗明義命名為《 BREAK a LEG演唱會》。

欣宜第二次靈活演繹壞事變好事。

08年接拍第一部電視劇《畢打自己人》計起,正式入行十年,欣宜這樣形容自己的事業路:「關關難關關關過。」

這一刻,你就算沒有衝動為欣宜過五關斬六將喝采,相信也暗暗給她加分。







03年,有意入行的欣宜減去 100磅,由肥變瘦,令人眼前一亮。





05年,欣宜扮白雪公主,在節目中錫吳卓羲,惹來不少抨擊。

返加拿大捧餐沖咖啡

大家都說欣宜天生吃娛樂圈飯,在台上揮灑自如,能唱能跳無怯場,比很多歌手有天分。不過出唱片,再有機會踏上紅館,並不是易事,有段時間,她不獲認同,覺得應該離開這個圈。

「大約一三年尾、一四年頭,我曾經想過放棄,出道第一年好好,大家都好支持,第一張碟成績不錯,但都試過出碟後反應好差,我有諗過放棄,一直以來,屋企人都好想自己返加拿大,嗰段時間,我曾經諗過係咪太任性,去追一個唔會有可能發生嘅夢,我有諗過聽屋企人話返去。但返去可以做咩?真係繼續沖咖啡,繼續捧餐,無乜大志咁就平平淡淡過一世。但咁啱嗰段時間俾我遇到蕭定一先生,佢好信任我,俾我做好多自己想做,但未必適合市場嘅音樂,所以我覺得自己嘅音樂路係關關難關,關關過,發生嘅都唔係我能夠估到。」她說。

接受自己

因為任性,因為有機會創新,她才可以在娛樂圈行不一般的路,完成她的夢想。

「我覺得要去到某一個境況,肯面對自己,承認自己就算瘦了,都不會係一個典型靚女,能夠徹底接受自己,即係就算我瘦咗,我個鼻都係插蘇鼻,皮膚依然係黃色,唔係白雪雪,亦唔會無啦啦有一對四十幾吋長腿…"當我接受自己永遠唔會變成好斯文、好嬌嗲嘅女人,我就好好多。記得初入行,不斷有好多敬佩嘅人同我講,叫我要減肥,總之要執執佢,我明白佢哋出發點,佢哋係真心想我事業好,因為之前冇我類似嘅 case,最容易就係跟保守方法去做,我明佢哋點解會咁,當時好似要達成一個唔真實嘅目標。」她說。

零支持激鬥心





打住石膏拍演唱會海報,她表示在外地睇騷時,會大叫 break a leg,即 good luck,所以索性將演唱會命名「 Break a Leg」。

一面倒被反對唱歌,欣宜當時受到極大打擊,不過零支持,反激起她的鬥心,決定要瞓身試一次。

「我當時受到好大打擊,有一啲我好欣賞嘅人,佢哋好真心同我講,叫我千祈唔好唱歌,穩穩陣陣留喺電視台做主持,我當時覺得莫名其妙,點解唔得呀?我好掙扎,但佢哋有經驗喎,一定唔會害我,我係咪應該聽佢講呢?另一方面,我又諗唔瞓身試一次,我會唔甘心,試過唔成功,我真係願意返加拿大捧餐,好過呢一世後悔無踏出第一步。」她說。

單打獨鬥再出現

情況就如跟發生意外後,面對手術一樣,其實當時她心裡有不少問號,也很為自己的腳傷擔心。欣宜說手術後馬上投入籌備紅館第一次,家人提議她休息停工,力勸她入紙改期。有着香港歌手的紅館夢情意結,自然沒有遵從,因她明白努力不等於機會。

以前那種單打獨鬥的感覺,她說又突然出現:「嗰段時間雖然好短,因為好快已經遇到第一間唱片公司老闆何(哲圖)先生,再之後又遇到蕭定一先生,就算之前嘅陳太(母親好友陳淑芬),雖然佢會同我講一啲激勵性說話,但我感覺到佢真係想我好,佢知道我嘅性格,可能需要咁樣先 push到我。我覺得做藝人,最緊要能夠聽真話,因為如果有一日唔能夠接受真話,就開始退步,我好感謝呢幾個人,佢哋喺我入行十年,包括拍劇嘅時間,俾我好大支持,因為佢哋,先有今日嘅我。」

這些年,沒有屋企人在身邊,她為自己事業打拼並作了不少決定,她覺得重要是對得起自己,活得精采。

「其實選擇乜嘢都好,都一定有得有失,但能夠將最鍾意嘅嘢作為職業係最開心,每份工都有壓力,我揀呢條路係正確,雖然真係來得不易,但只要入到錄音室,或者企上舞台,所有嘢都覺得係值得,所以會繼續加油。」她說。





跟許廷鏗感情好,有他在身邊,她的天空都是陽光普照。





入院做手術打石膏,她為了不讓其他人擔心,拍了一條片通知全世界。

天使許廷鏗

在單打獨鬥的環境中,她慶幸身邊有不少天使出現,其中一個是好朋友許廷鏗。他是欣宜入行的第一個好朋友,一度被指是拖友關係。在外地受腳傷,為怕影響對方工作情緒,兩人視像通話時,也沒敢第一時間通知他。

「當我心情好差,覺得個天好似要跌落嚟,或者好緊張,佢電話一到,就會無事,就會心情好靚,我覺得個天好公平,自己一個人喺香港生活,但係個天都派咗好多天使俾我。許廷鏗份人好善良,我哋可以係死對頭。我同佢同一年出道,同一間唱片公司,佢嘅宣傳費多啲,我嘅變相少啲,我多啲,佢自然少啲,兩個應該互鬥,但我哋都唔識,因為咁兩個 friend咗。我受傷,佢當時喺馬來西亞拍嘢,要宣傳一首好輕快嘅歌,我唔想影響佢情緒,我個人就係咁,唔鍾意話俾人聽,直至做完手術先講俾大家聽。」

「所以你之前問我,有冇覺得自己單打獨鬥,初初入行頭幾年,我可以答你絕對係,因為我嘅性格會推開人,我好渴求獨立,由細到大都希望自己能夠撐起自己,可能因為好細嘅時候,我已經了解到因為父母關係,無論點做都好,都要用好大努力證明自己,細個好想證明俾大家睇,人大咗,發現只需要證明俾自己睇就足夠。」她說。

外間以為小時候萬千寵愛在一身,欣宜坦言不想令身邊人擔心,已經習慣不靠人。她愛搞氣氛逗人開心,甚至在病榻上,這病態舉動連她也自覺疲倦。

「細個開始,屋企人灌輸我一個概念,就係屋企人永遠都錫你,但始終有一日會離開你,到時就要自己照顧自己,細個發燒,可能係十一、二歲左右,想嗲吓婆婆同屋企人,佢哋嘅反應通常都係「做咩啫,病之嘛,好快會好番」,所以我比較鍾意扮無嘢,唔想影響人,整親腳之後,有同事打電話問候我,仲叫我唔好逞強,我收線後即刻爆喊。」她說。

推開人,同時又渴望別人的關心,欣宜自知矛盾不一的行為要處理。





秋官其實很錫欣宜,她入院後的每一天,都會送湯給她補身。





肥姐離開十年,欣宜的工作成績單優異,絕對見得人。

「任何關係,同事、屋企人、朋友、伴侶都好,都要學識去溝通,我份人好鍾意收埋,收得耐,積累得多就會爆出嚟。我覺得自己已經進步咗好多,每個人都有情緒,做藝人嘅責任係要娛樂大家,所以點樣平衡,搵一個健康方法釋放自己,第一件要做嘅係好好溝通。」她說。





十年

肥姐 08年離開,整整十年,欣宜直至在 16年的《叱咤樂壇流行榜頒獎典禮》中,憑大熱《女神》攞獎,她覺得才是最適當時機,在台上公開感謝生命中最重要的母親,因不想外間說她消費父母。至於父親鄭少秋,要不是人家問及,她從來更加不會主動提起。

「話我消費屋企人係最 hurt,因為屋企人就係屋企人,無得揀亦都真係無佢哋就無我,呢樣嘢係好真實。」

撰文:歐陽慧芯 

攝影:黃志明 

形象: Constance Lee@ConStyle 

髮型: Milk Chan@xenter

化妝: Samuel@江中平化妝室 

場地: Red MR紅人館


鍾意就快D Share啦!