現年69歲嘅許紹雄（Benz），92年娶咗羅樂林太太陳寶儀親家姐龍嬿而之後，生咗囡囡許惠菁（Charmaine），唔經唔覺，囡囡已經21歲，仲越大越靚㖭。大前日Charmaine21歲生日，Benz特登早一日幫囡囡喺跑馬地搞咗個生日party。除咗Benz一家三口之外，仲有羅樂林、陳寶儀、陳志健同太太羅苡之以及韓馬利等等。
Benz前日喺社交網貼咗幾張囡囡生日party相，留言話：「我女兒Charmaine，祝你生日快樂、身體健康！」Charmaine亦有喺社交網轉發相片，留言話：「我愛你哋，我21歲喇！」相中Charmaine着透視裝，越大越索。而Benz早前曾經同傳媒講佢囡囡讀緊浸會大學讀傳理系三年級，由於囡囡對娛樂圈工作冇興趣，所以冇諗過入行。
名花有主
馮仁昭噚日打畀Benz，讚佢個女越大越靚，Benz好開心咁話：「多謝多謝，佢夠運，唔似我，似媽咪。」Benz話阿女讀埋今年就大學畢業，問到阿女有冇拍拖，佢就話：「後生女拍拖呢啲梗有㗎啦，咁大個女，佢鍾意點就點，我唔會管佢。」
撰文：馮仁昭
|
鍾意就快D Share啦！
|
|
|
