在手機頻出新款、普及化的年代，手機壞了，不少人會毫不猶豫地換機，款式舊了也會換機。新的來，舊的去，很多人習慣買新機的同時，出售他們眼中已沒有用處的舊電話。有人把它們視為垃圾，但亦有人將之視為至寶，並用它們拼湊出一段完整的手機進化史。
「我哋儲舊電話最慘就係啲電池嘅問題，因為啲電池老化或者脹咗，就唔用得㗎啦，但其實我啲機全部都係運作正常，問題係你已經搵唔返佢啲電池」翻找着幾個放滿了600多部舊電話的儲物箱，49歲的譚偉業一邊說，一邊把一個個用膠袋包好的珍藏拿出來。問他收藏是否有「價」，他笑着否認：「呢啲基本上係冇人吼嘅嘢，係我呢啲怪人鍾意呢樣嘢，先會買返嚟。」這些「寶箱」盛載着的，還有一段段手提電話發展史。
談起手機的發展，他拿出俗稱「大哥大」、最早期發行的電話。當年一個大哥大索價數萬元，電話費動輒上千，用得起的人通通非富則貴：「香港80年代開始，好多港產片有大哥大電話出現，都係啲有錢佬、生意人，或者係好似啲黑幫大佬出嚟講數，甚至係一個武器！」標誌性的外形、水壺般大的機身，機背匣沉甸甸的電池亦佔了機身體積的四分之一，所以更有「磚頭」的別稱，不過其功用只有一個：「其實佢實際功能只係通話，依家睇返轉頭，就好似有少少大而無當咁囉，不過呢個設計真係好有代表性嘅。」
不過對譚偉業來說，最具代表性並非大哥大，事關這部手機面世時，他還是一個學生，貴價的大哥大對他來說，是遙不可及的事。到了手機開始普及的90年代，譚偉業開始工作後，終於買了第一部屬於自己的手機 － Ericsson GH337，並開始對手機着迷：「因為我本身係讀設計出身，所以對於一啲靚嘅design好鍾意睇、收藏、認識，因為嗰個年代係百家爭鳴嘅時間，個個廠商都出唔同嘅型號、造型。」而Motorola所出的StarTAC則是他最垂青的一部收藏：「佢將厚龜再縮細，而呢個造型同時係全球第一部摺嘅電話，所以當年嚟講，係好令人『嘩！』咁㗎！」
在他口中的90年代，是一個豐盛的年代，於是他開始頻頻換手機型號、收集手機的習慣，閒時去深水埗鴨寮街、二手手機店逛逛，或者在網上平台找舊款手機，慢慢儲下了大量收藏。直機、翻蓋才見到鍵盤的「摺龜」、摺機、滑蓋機身的「推機」、旋轉屏幕手機，五花八門、不同牌子的都有，甚至有如電子詞典機、專為商務人士上網用的、按下按鈕鍵盤才緩緩升起的、專為遊戲而設計的、呈葉片形的，各種風格各異的電話。
從大哥大的1G網絡，演化到人人一張SIM Card，甚至有了多媒體元素、可以「龜速」上文字網頁的2G網絡，再到開啟3G的世代，可以用電話上網瀏覽新聞資訊，譚偉業說那是具歷史性的一刻。進入後4G世代的現在，譚偉業手上的亦變成了新款的智能手機，可是他只用不儲：「依家部部電話都一樣，都係一個長方形，背面一、兩個鏡頭，甚至而家出到3個鏡頭，前面一個Mon(屏幕)，咁就冇㗎啦。」在這「鬥功能」的世代，這些新手機再勾不起他收集的意欲：「個設計變到好悶，冇設計可言。」
縱然智能電話每日推陳出新，他認為香港人對舊電話始終有一種情意結，皆因它們在大家的成長階段中佔據了一個「好重要嘅Moment」：「當我哋喺商場準備緊個(手機)展覽、擺飾櫃嘅時候，好多市民行過話：『哎吔！我嗰時用呢架機！』、『嘩！呢部我嗰時儲咗幾多個月錢先買到呀！』，好似搵返佢好多好開心嘅回憶。」
------------------------
《骰寶坊》誠邀各地【賭王】【賭后】挑戰神人境界，每日更有百萬籌碼等你領取！
立即免費下載，體驗《骰寶坊》最真實、刺激的多人在線骰寶遊戲！
遊戲下載：https://goo.gl/j16mcF
|
鍾意就快D Share啦！
|
|
|
