早排網民圍爐狂笑一張「袁文傑和韋家雄將於今年底結婚」嘅合照，吓！舊番梘邊個執先？原來語病笑料一則，其實係寫佢哋同樣今年成家立室！好多口痕友講開個樣唔似「50+」嘅韋家雄時，成陣酸味攻埋嚟話佢執到，講到佢齋呼吸，就追到細自己廿年嘅銀行之花Keynes咁！世上冇醜女人，只有懶女人，我Nuts哥話：「世上冇醜嘅男人，只有鵪鶉嘅男人！」男人老狗，冇錢冇樣唔緊要，硬淨有勇氣有骨氣，吊吊揈都一樣掂過碌蔗，頂天立地！韋家雄呢份「大叔的愛」就係咁嚟！
震住溝女冇詐型
上帝造天地萬物都要花六日，第七日要休息，但係韋家雄拍拖到第七日，就話要結婚嘞！快狠準！好多人話港女扮晒嘢吊高嚟賣，我Nuts哥只知，只有豬肉或牛肉先會吊高嚟賣！溝女講戰術，剛柔並重，節奏要識掌握，當然，出征前秤吓自己，你靚仔過孔劉同吳彥祖，但開口夾着脷，零風度失禮人，得個殼，返屋企吔飯「大力」韋家雄個樣戇直，咪以為只係得牛力冇食力，唔似得佢阿哥金牌編劇韋家輝咁食腦，其實睇佢溝女就知係智勇雙全，自編自導自演，橋段緊湊又浪漫過阿哥部《孤男寡女》！偷聽敵方向Keynes「抄牌」，未夠廿四小時，好似唧牙膏咁一Call就約到Keynes撐枱腳。緣分天注定，一見如故傾唔停，Keynes最欣賞係佢着住短袖衫凍到騰騰震，凍到死都繼續傾冇詐型，都話男人持久力好緊要！融入家中，連女方個嫲嫲都照顧周到，有愛心有誠意，大人細路都鍾意！
一鋪翻身 戒食檸檬
韋家雄智取美人歸，多得過往鋪鋪清、鋪鋪傷嘅人生經歷！ 本來係塑膠廠太子爺，老竇為小三拋妻棄子，仲絕到斷水斷糧， 佢同阿哥撐住頭家，十二歲做非法童工，天未光喺酒樓推車仔賣點心，放學做阿茂學整餅，搵得一蚊得一蚊，十八歲前都冇張自己床瞓吓！拍戲永遠做綠葉，個個將佢同阿哥比；做幾次生意， 唔係金融風暴就係畀人呃，嘩！唔通連個天都唔鍾意佢？佢又冇咁問過喎，只話有手有腳，衰咗咪再嚟過囉！輸得起，沉住氣， 一鋪返晒嚟，睇準市場搞特效公司，有聲有色；做咗廿幾年綠葉，終於有人識貨封為最佳男配角！查實主角或配角都係要好戲，唔少男一都樣膠戲屎黐脷筋，把鬼！
勇氣可嘉，傷完又追過，唔會冇膽入情關，韋家雄經歷婚姻失敗做單親爸爸，雖然追過前港姐葉翠翠，被質到成口檸檬，但轉頭又追掂細自己十九年嘅陳嘉嘉，可惜拍幾年拖又散，分手半年女方仲閃嫁，唔Hurt就假！傷還傷，嘢可亂食，女咪亂揀，笨極都唔會笨七次嘛？個個都想做公主，唔通個個都係公主咩？唔少女仔「公主癌」言行失智Too naive，開口扮嗲作狀娃娃聲，樣貌身材人工化，成個Package 係「我的硬膠女友」，仲要叫人嗌佢做「Baby」，真係慳啲啦，Baby！「真」愛難求，歌神許冠傑都唱「難分真與假，人『面』多險詐」閱人無數嘅韋家雄，見Keynes「高汁」無添加，仲等咩？雖然係遲來的春天， 但遲到好過冇到， 牡丹雖好，也需綠葉扶持，綠葉王如佢，終於遇上一朵識欣賞佢嘅鮮花，飲得杯落
|
鍾意就快D Share啦！
|
|
|
