林寶已經高過爸爸媽媽喇。
藝人林曉峰同老婆康子妮育有兩個仔仔，大仔叫林寶今年15歲，而細仔林熙今年14歲，呢日林曉峰就帶埋老婆同兩個仔與前DJ Martin聚會，佢哋一家同朋友合照，重點就梗唔係林曉峰而係佢大仔林寶，只係得15歲嘅佢已經生得非常高大，高過晒爸爸媽媽，簡簡單單穿T恤加牛仔褲已經相當有型，個樣仲生得幾俊俏。東網前年都影過林寶跟爸媽細佬去睇戲，當年13歲嘅佢同依家係判若兩人，估唔到2年間變化咁大，真係「仔大十八變」！
生得高大當然有原因因為林寶好鍾意做運動，係羽毛球好手，仲被學校推薦加以特訓，兩兄弟都加入體育學院精英培訓計劃，林寶仲成日同老竇一齊去做Gym操fit body。康子妮早前出席活動時，曾透露大仔好鍾意唱歌跳舞想加入娛樂圈，仲話兩公婆都會全力支持，睇嚟林寶真係夠晒條件喇！翻查林寶社交網，佢同啲同學仔感受好好，仲搭女同學膊頭合照，都幾受異性歡迎，而正值青春期嘅佢都相當注重外表，見佢手執直髮夾再拎電話自拍，應該就係騷下佢個新髮型！
林氏一家一門多傑，林曉峰家姐林珊珊係著名DJ及經理人，佢兩個女西瓜及野人都喺DJ界及網台衝出一片天，而佢胞兄林海峰更係瓣瓣掂，身兼DJ、歌手、節目主持、演員、導演及搞棟篤笑，佢同彭羚所生兩個女都遺傳咗媽媽嘅美貌，大女林泳生得好有氣質。
來源 source: http://hk.on.cc
|
鍾意就快D Share啦！
|
|
|
