《延禧》皇后秦嵐日前早山竹一步襲港，風頭一時無兩。訪港期間，秦嵐多次強調自己睇港劇大，好鍾意香港。佢無講大話架，除咗拍過港劇《我和殭屍有個約會》，原來上年（2017年）亦翻拍過經典港劇《萬水千山總是情》，並飾演汪阿姐嘅莊夢蝶一角添。
不過，最令人意想不到嘅係，四哥謝賢相隔35年，以82歲之齡再次參演呢部經典劇，真係老當益壯、老而彌堅呀！
已經82歲嘅四哥依然好fit，閒時除咗行街high tea，不時亦會行山keep住副偈。早前《壹》仔就見到佢同個friend去登高，你睇佢心口兩嚿胸肌，仲係脹卜卜結實過唔少後生仔架。不過，究竟佢怕熱定唔怕熱呢？著住樽領但同時又係雞翼袖，真係好難理解。算啦，四哥咁多年都咁有型，自然有佢道理架啦，都係嗰句：「fashion嘅嘢識條鐵咩。」
講返套劇，雖然四哥82歲仲好fit，但齋諗都知佢無可能再演阮庭深一角，同37歲秦嵐做一對啦，點會咁益秦嵐呀！四哥喺新版本入面，飾演舊版由鮑方飾演嘅阮濤，因家族世仇關係反對阿仔同莊夢蝶（秦嵐飾）結合。據知新版《萬水千山總是情》，原本計畫喺香港回歸20周年時播放，但一年過去都播出無期，咩原因就真係唔知喇。
順帶一提，68歲劉松仁亦有參演新版《萬水千山總是情》，飾莊鴻儒。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
