資深DJ陳海琪在廣播界打滾近三十載，做過香港三間電台，最近重返港台開咪。日前她接受《蘋果》專訪，大爆娘家商台感覺恐怖，要在驚恐中度過，反而在港台深得前輩愛錫，與同事也相熟。
在廣播界資歷深厚的陳海琪，最近重返港台主持節目《悠長假期》。海琪90年代在商台首次開咪，其後做過港台、新城及不同網台，也曾主持電視節目。她日前在港台接受《蘋果》專訪，指商台和港台風格大不同。
最先在商台開咪的海琪說：「喺商台，試過有人做兩個鐘節目，做咗半個鐘，主事者（即俞琤）帶埋另一個主持落直播室換人，唔畀佢入返去，我嘅少女時代係喺咁驚恐嘅時刻度過，係好恐怖嘅！」海琪續謂：「主事者好清楚大家喺電台嘅習性，知你凌晨3點瞓，2點9會打嚟叫去開會，去到佢會話『你知唔知你噚晚12點20分播嗰首歌好好聽？』然後就講完㗎喇！有啲人會俾佢鬧，我冇試過，佢對我幾好嘅！」
與歌手做知己
至於港台，海琪表示有好熟落的感覺，同事都相熟，又指當年前輩都好愛錫她：「喺我低潮嘅時候，甄妮同我講『舉起左手、舉起右手都係錯』；霑叔叫我『記住，『滄海一聲笑』唔係一首歌，係一個境界，要好似佢咁豁達，我可能一世都唔識。」海琪在廣播界多年，與不少音樂人關係密切：「當年梅艷芳、張國榮、陳百強都打拼緊，電台同音樂人嘅關係好密切，可能港台又闊落啲，嗰時又有個好出名嘅小酒吧，大家會留喺度傾音樂、生活，交心到做到知己。我好鍾意呢種關係，大家係真心朋友，真心鍾意音樂。」
唱歌感情重要
作為一位DJ，海琪認為流行歌香港仍然領先，但內地資源充足，她又嘆謂：「香港樂壇真係唔爭氣，可以做得更好，前人種落咁大塊田，表演嘅形象已經去到明星級培養。」海琪又謂：「以前葉德嫻錄《邊緣回望》，為咗頭一句歌詞用嘅感情，佢可以拗成晚，𠵱家一定冇可能。」海琪覺得唱歌最重要的是情感：「就算只係造一首歌，冇問題，對音樂嘅態度先係問題，唔係唱幾首歌，去到紅館就係成功。」她感慨從前歌手真正代表到香港，在日本、東南亞都有人識，反觀現在已經沒甚麼可代表到香港的歌手。
採訪：盧妹
攝影：沈健程
|
鍾意就快D Share啦！
|
|
|
