無綫節目《都市閒情》將轉形式，一班主持擔心「冇得撈」，但當中「韓國通」宋芝齡原來私下搞韓國生意愈撈愈掂，月入是無綫人工的10倍！難怪她日前被拍得駕駛百萬名車到中環名店買午餐，更有三名傭人貼身服侍身價10萬的愛犬！
現年39歲的中韓混血兒宋芝齡因參選港姐而入行，其後大多擔任主持工作，包括近年主持《都市閒情》，可是該節目早前決定轉型，一班主持一度「生死未卜」未知去留。不過，向來被喻為「韓國通」的宋芝齡絕對唔使憂，據知十年前開始搞韓國生意的她，經過一番努力，近年已到達收成期，其中韓國語言學校更搞得有聲有色，在香港區已開兩間，明年更會以特許經營方式擴充至六間，目前月入高達六位數字，足足是無綫人工的10倍！
辦學校兩間變六間
搵到錢，生活質素當然有所提升，宋芝齡日前便駕着價值逾百萬名車離開屋企，到中環名店買燒鵝做午餐！醫飽個肚，她隨即返回銅鑼灣語言學校巡視一番，一落車便有三位工人帶着其名種波索獵犬（Borzoi）迎接，其中一位傭人幫手泊車，另外兩個則分別幫手拎嘢及拖着體形龐大的愛犬，「三星伴月」就如女王出巡一樣，相當有氣勢！據知，波索獵犬身價不菲，若出自名門的話可高達10萬元！
事後聯絡宋芝齡，問到在商界大展拳腳搵到幾桶金？她謙虛說：「唔係！只係啲生意慢慢上咗軌道。」直言十年前開始搞學校，初時擔心招生不足，又要做埋導師及整理教材，當時經常在學校捱通宵，但經過多年努力後已發展至一定規模，現打算由兩間增加至六間：「生意唔錯，係有咁嘅想法！不過，我真係分身不暇，所以會以Franchise（特許經營）形式去做。」
撈埋韓國投資移民
除了辦學，宋芝齡近年還染指韓國投資移民，她說：「起初只係有朋友想喺韓國做生意同買樓，叫我幫手睇啲條款，先發覺移民門檻只需300萬左右，之後有好多朋友都有興趣，所以就做埋投資移民生意，依家都搞得幾好。」做生意有聲有色，問到有否考慮退出幕前？她說：「我好喜歡主持工作，如果我唔做幕前應該會走晒樣，唔會扮靚，所以一定要Keep住做！同埋啲生意都上咗軌道，依家要學識放手，畀啲同事去處理，有番自己嘅生活。」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
