馮盈盈喺大台節目《後生仔傾吓偈》中話港姐嫁有錢人就會被指係「公廁」或「做X」，唔少人都覺得言論太過大膽。2010年港姐季軍莊思明今日接受傳媒訪問時，直言覺得好cheap，佢話：「唔好理係咪香港小姐，作為藝人咁講唔應該，仲要喺節目內講，影響睇嘅人，時下年輕人又會學㗎嘛。加上佢係冠軍，更唔應做呢啲字眼，會徹底影響港姐形象，會搞到好cheap，唔應該咁講嘢。」
而03年港姐亞軍楊洛婷被指嫁個有錢人，早前同老公、樂隊Dear Jane主音黃天翱（Tim）斥資逾二千萬購買清水灣傲瀧一個單位連車位，（相關新聞： https://bit.ly/2NfezBe ），楊洛婷笑說：「我都希望佢（Tim）係呀，我都想唔使做。Maybe generation gap！可能細路女，講吓笑。」
對於師姐未能接受大膽言論，馮盈盈今日都有解釋番點解會咁講，佢話﹕「其實睇番個節目，我係話如果女仔嫁個有錢人，就會有人話我哋『點點點點點點……』我哋係轉述番，有時喺網上或坊間有啲好偏頗、好不實嘅意見及批評，總有人喺茶餘飯後食花生，畀一啲佢哋好主觀，純粹佢哋嘅諗法擺喺女仔身上。」
盈盈自言係因為抱不平，佢話：「有時坊間對我哋啲女仔或女藝人，係用兩把尺嘅標準去衡量，咁其實對我哋女藝人及出名啲嘅港姐，甚至對我哋女性嚟講都係好唔尊重同唔公平，因為女仔其實有權利去選擇自己幸福。」不過盈盈亦承諾會檢討：「呢啲字眼真係網民成日講，其實睇節目覺得太過火，咁網民用呢啲字眼攻擊其他人都係咪太過火呢？喺網上話人冇問題，拎上節目講就有問題？！如節目上要收歛啲，可能之後再審視吓，用字再溫和啲、忍晦啲，今次引起大家討論，都可以睇吓電視呎度可以去到邊，係幾有價值同意義嘅討論。」
而拍檔麥明詩亦幫口話：「其實只係複述，唔講呢兩個詞彙就講唔到呢件事。其實咁形容女仔都係唔好，來源其實係來自佢哋(網民)。」
精選娛聞，喺晒《娛果》
http://fb.com/appledailyent
| 馮盈盈喺節目說話粗鄙，兩位師姐莊思明同楊洛婷都唔係咁贊同。(ig圖片/資料圖片) | | |
| |
|
鍾意就快D Share啦！
|
|
|
