熱爆娛樂: 【斷食排毒】洪金寶為老婆孫仔戒澱粉坦承「思想比較痛苦啲」 _

2018年10月17日星期三

【斷食排毒】洪金寶為老婆孫仔戒澱粉坦承「思想比較痛苦啲」 __,洪金寶,

「三毛」洪金寶今日現身西貢，出席林敏驄執導電影《如珠如寶》開鏡拜神，明顯消瘦咗，佢坦承自己減磅中：「因為老婆（高麗虹）話肥呀、唔健康呀，又話糖尿病呀，減食呢啲嗰啲，（佢有冇俾啲餐單你？）冇，總之就唔准食任何澱粉質嘅嘢。」問到三毛會唔會成日覺得好肚餓，佢話：「又唔會，但成日想食嘢咁，尤其係麵，飯我可以唔食，但有時麵包、菠蘿包、炸醬麵嗰啲，思想比較痛苦啲。」

三毛話佢做緊個療程，好似人哋「斷食」咁，連佢老婆高麗虹都有做：「o依家做緊一種療程係餓一日，我老婆嗰啲係餓兩日，兩日係完全唔食嘢嘅，淨係飲嘢、飲菜汁，然後又疴到嗌救命。之後食番5日，嗰5日又係唔可以食任何澱粉質嘅嘢，跟住第6日又嚟，我就頂唔順，最多只係唔食一日。」

三毛亦坦承，拍戲期間比較難保持呢個習慣，佢話個療程要兩個月左右：「總之係個精神挑戰犀利啲囉！（咁太太有冇話要減幾多磅？）佢唔係話減幾多磅嘅問題，係將我身上嗰啲…即係我食咗廿幾年嘅藥，o依家可以將你啲藥將佢排出體外，（有冇話完成個療程後點樣奬勵番你？）奬勵番我？佢話俾我娶二奶囉！哈哈哈！」三毛話其實老婆見佢成功做到都好開心，佢話：「每次我減完之後佢都好多謝我，好感恩，佢話我咁樣做，係俾機會我同佢一齊耐啲，呢種嘢係對生命好安慰嘅，佢又成日話：『如果你想對啲孫耐啲，你要照顧自己呀！』」

提到啲孫，三毛笑住話：「o依家好似我個孫都知，噚晚我同個孫食飯，攞個朱古力桶食朱古力，我問佢可唔可以俾一粒爺爺？佢話『爺爺你唔食得甜㗎喎！Nana（即嫲嫲高麗虹）喺嗰度喎…』嚟提我。」

精選娛聞，喺晒《娛果》

http://fb.com/appledailyent

同兩年前相比，洪金寶真係瘦咗好多，個肚腩唔見咗一大截。（左圖：陳慧安）	三毛今日現身時，真係瘦咗成個碼有多。	 三毛話老婆高麗虹都有份「斷食」
 睇番三毛啲舊相，以前已經係咁嘅身形。（《城周》圖片）	 2016年三毛接受《蘋果》訪問時，個肚腩仲好「凸」出。	 三毛年前被《蘋果》讀者「爆相爆片」影到佢坐輪椅去買餸。
 到今年1月，三毛已經好番，仲入馬場睇馬，當時身形仲係好「健碩」吓。	 今年4月，三毛出席香港電影金像獎頒獎禮，身形開始有啲fit。