2018年10月18日 星期四

【成龍稱再無香港電影】洪金寶心痛港片沒落 指有人中飽私囊犧牲後進 __,成龍,洪金寶,

「只有一種電影,叫『中國電影』,香港電影,也是中國電影。有些我們拍香港電影,只是拍給香港人看,但香港人也可以拍《紅海行動》給全中國人看。」成龍如是說。 ...


「只有一種電影,叫『中國電影』,香港電影,也是中國電影。有些我們拍香港電影,只是拍給香港人看,但香港人也可以拍《紅海行動》給全中國人看。」成龍如是說。



今年3月,成龍出席「全國政協十三屆一次會議文藝界別舉行小組討論開放日」,會後受訪談及對電影市場嘅睇法,佢話:「你要拍黃大仙(『黃大仙』三字用粵語講),你可能只能在香港播,你來到中國票房一定會不好,人家不瞭解,但你拍一些宏觀一點的,國際性的,好像《紅海》啊、《戰狼》啊,你就會去到國際。」結果,《紅海行動》依家仲代表埋香港,報名參加奧斯卡爭逐入圍最佳外語片。



咁,份屬同門嘅三毛洪金寶又點睇?



三毛今日與王菀之、恬妞、張繼聰等,今日到西貢出席林敏驄執導電影《如珠如寶》開鏡拜神,現場佈置如舊式老人院,院內設有好多舊式道具,牆上掛了數張由林敏驄扮老人家嘅相,佢笑指相中嘅人係祖先。



三毛話今次因為林敏驄而拍戲,仲想睇下依家嘅香港電影係點做。「香港電影,我都好耐冇參與過。你依家喺香港拍電影,究竟拍香港電影係點,我都想知道一下。因為對我嚟講,香港好似就嚟冇電影咁!」



「你成日話有新秀新秀,你根本啲新秀一出嚟就係諗住慳錢,慳住個荷包,都唔敢去思想創作大呀盛呀,好難。依家啲人只係識慳,識慳識儉,餐餐都鹹魚,即係,你冇俾機會啲新導演,思想再創大,因為啲人唔敢去諗。」



「香港嘅電影,由我細路仔開始到依家,蓬勃咗幾多年?香港嘅電影潮流,係帶動過幾多國家?依家連泰國拍啲廣告都好到不得了。點解外面啲人咁有慾望想睇其他國家電影?點解連基本local嘅觀眾都唔想睇香港電影?」



「唔係我帶唔帶新人(嘅問題),而係我帶咗啲新人,跟住點?香港根本冇武打明星。你話俾我知,依家啲香港後生仔、細路仔,佢哋練功嚟做乜嘢?以前我哋咁多武打片,有一種希望,呢個係hope,我哋練功,係想做大明星超級巨星;依家啲人練完武功都係賣叉燒包啦,咁我練嚟做乜嘢先?冇前景,你根本都冇嘢諗,學話事齋,你做乜諗嘢呀?你唔好諗咁多嘢啦,做乜諗嘢啫?冇希望俾後一輩。個心係好唔舒服,好心噏。」



三毛感謂香港電影沒落已久,越講越勞氣:「即係好似早輪香港電影金像獎咁,叫我出席,(頒)最佳武術指導獎,我想唔去,但諗諗下覺得,如果唔去,我驚冇機會去。香港(電影)冇0架喇。」



「你話政府唔幫,我都唔知政府可以點幫法。太投機。就算政府幫你2,000萬,啲人唔係正正經經利用呢2,000萬將香港電影市道再帶番起,而係諗搵你1,800萬、袋咗落個袋先。好多人都有呢啲咁嘅私心。我唔係話每一個人都係,而係有啲人會中飽私囊,唔係為電影圈發番嗰個光芒出嚟。你依家話政府攞200萬出嚟,200萬做得啲乜嘢呀大佬?」(編按:林鄭月娥在施政報告中建議電影發展基金一次過注資10億)



恬妞指因無劇本只得大綱,第一日拍戲會緊張,不過第二日已進入狀態,但佢最想嘅其實係開演唱會:「希望3年內可以喺紅館開演唱會,做戲幾廿年想突破,我唔係咁鍾意做戲,我鍾意唱歌,享受燈光音響同掌聲。」記者提議搵林敏驄填詞,她非常驚訝,唔信對方有音樂造詣。



精選娛聞,喺晒《娛果》

http://fb.com/appledailyent





(攝影:陳慧安) (攝影:陳慧安)
洪金寶指依家嘅香港電影,會為慳錢而限制咗創作

洪金寶指依家嘅香港電影,會為慳錢而限制咗創作
恬妞唔信林敏聰有音樂造詣

恬妞唔信林敏聰有音樂造詣
吳耀漢話兒子吳嘉龍有得揀的話,未必會揀自己做老竇

吳耀漢話兒子吳嘉龍有得揀的話,未必會揀自己做老竇
洪金寶、恬妞及吳耀漢等,今日出席電影《如珠如寶》開鏡拜神

洪金寶、恬妞及吳耀漢等,今日出席電影《如珠如寶》開鏡拜神
張繼聰、王菀之、林盛斌

張繼聰、王菀之、林盛斌

鍾意就快D Share啦!