鄧紫棋（G.E.M.）曾經計劃到太空漫遊，喺2014年宣佈任亞洲首位華人形象大使，當時仲話15年會去去阿姆斯特丹接受航空訓練。而宇宙巨G.E.M.仲有過唔少穿上太空衣嘅相，真係去旅行做足準備，可惜準備咗唔代表去得成太空，17年G.E.M.喺一次活動上透露，收到email通知太空之旅唔成行。（新聞連結： http://bit.ly/2qplf1Y ）
去唔成太空，一樣可以去美國太空總署（NASA），其實G.E.M.噚日已經喺ig話自己到咗NASA，原來佢今日喺NASA位於矽谷嘅Ames研究中心出席有「科學界奧斯卡」之稱嘅「科學突破獎」頒獎典禮。
G.E.M.今次擺脫「時裝車禍」呢個惡名，以一件低胸深色晚裝行紅地毯，主持人同佢chit chat時，佢就話係「I am from Hong Kong（我嚟自香港）」，又透露會唱出電影《太空潛航者Passengers》中文主題曲《光年之外》。
之後喺頒獎禮上，G.E.M.都有份做頒獎嘉賓，得獎者係一位印籍年輕男士，佢仲同得獎者攬咗攬。G.E.M.喺壓軸表演時換咗套白色晚裝，喺台上一展歌喉，台下觀眾都報以幾熱烈嘅掌聲。G.E.M.演唱完，用英文講：「好榮幸今晚可以在場。」再用普通話講謝謝同向觀眾鞠躬。
G.E.M.回覆《蘋果》時表示：「收到邀請時當然受寵若驚，因為表演的是自己原創的中文歌曲，沒想過有一天能夠將華語歌曲帶到國際舞台上，非常興奮。在現場看到頒獎禮的製作也非常讚嘆，很高興成為大型頒獎典禮的一份子。今次表演最重要的意義是鼓勵為這個世界作出貢獻的科學家，所以我可以置身於一班有才華的傑出科學家之中，感覺很榮幸。」
呢個頒獎禮，上年請咗摩根費曼(Morgan Freeman)擔任大會司儀，另外又請咗中國大提琴演奏家歐陽娜娜演出，歐陽娜娜一展身手同樣令觀眾喝采。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
