張衛健拍《大帥哥》，劇組人人都讚佢無架子又肯照顧人：拍攝時無限提供零食、麵包、水果；大熱天時佛山取景安排冷氣車；臨場為「天嬌扮哭」場戲加對白；放工返到屋企又為「艾妞回大帥府」一幕度橋。Dicky對同事尚且如此，更何況係獨力湊大自己幾兄弟嘅媽媽呢？最近天氣轉涼，呢個孝順仔立即出動買女裝毛毛鞋，老婆張茜喺北京，斷估都係買俾阿媽架喇。
Dicky出晒名係圈中孝子，2013年內地拍劇期間，突然驚聞75歲媽媽喺洲際酒店游水時遇溺昏迷，嚴重到心跳、呼吸停頓，嚇到Dicky立即趕返香港，更為天主教徒嘅媽媽安排祝福儀式，好彩最後無事，誠如佢車牌所言：「Thanks God。」
自此之後，Dicky花更多時間陪伴喺媽媽左右，有指曾花5千萬買單位贈予媽媽入住，閒時又會陪阿媽貼地食下粥，細心程度爭在未吹凍埋碗粥咋。另外，媽媽酷愛游泳，康復後繼續游，孝順仔Dicky就傍住阿媽一齊游，行街、食飯、返教會都兩母子孖公仔。早前楊秀惠新店開幕，Dicky都有現身撐場，但就玩快閃好早離開，據知都係因為趕住陪阿媽食飯，真係萬事以阿媽為先。
來源 source: http://nextplus.nextmedia.com
|
鍾意就快D Share啦！
|
|
|
