女子組合Freeze雖然短短四年就玩完，但當時打住「整容三嬌」旗號，再加上性感火辣外型，一度成為娛圈焦點。拆夥後，三位成員中只得陳樂榣毅然離開娛圈，因為老竇啲債還晒，細佬亦大學畢業，係時候做返啲自己鍾意嘅嘢，例如湊女享家庭樂。
中環海濱舉行嘅嘉年華已成港人一年一度必去熱點，陳樂榣兩公婆當然唔會錯過，早前更帶埋囡囡去湊熱鬧。囡囡4歲左右，成程騎住爸爸膊頭高人一等咩都睇得清清楚楚，見到得意嘢仲會手指指指揮爸爸前進添。個女面珠墩肥嘟嘟再紮埋孖髻鬼死咁可愛，影相留念當然唔少得啦。
陳樂榣當初加入娛圈，就係睇中公司開出嘅條件，收入幾萬到十幾萬都有，做滿4年約已經還清老竇啲債，仲可以供埋細佬大學畢業。膊頭輕鬆返，陳樂榣教畫畫、賣衣服飾物，未必搵得比做藝人時多，但勝在開心，又有個咁得意嘅女，就算成世孭住「整容三嬌」個朵，但一樣可以好幸福。
來源 source: http://nextplus.nextmedia.com
|
鍾意就快D Share啦！
|
|
|
