張致恒（Steven）7月突然宣佈雙喜臨門，與粉絲雯雯已經誕下囝囝「天寶」，並將會結婚，隨即爆出他一腳踏五船，形象直插谷底。昨日Steven與雯雯抱着約四個月大的囝囝到律師樓進行註冊儀式完婚，Steven表示：「之前犯咗一個好大錯誤，影響好多人。」並指會改過、反省自己，現在每日照顧太太與兒子。
相關新聞：一腳踏五船 欠舊愛10萬
現年34歲的張致恒在7月尾，突然宣佈將會與粉絲雯雯結婚，囝囝「天寶」也已經100日大，不過婚訊傳出後，Steven即被爆一腳踏五船。昨日在一號風球下，Steven與雯雯冒着風雨，抱着約四個月大的囝囝到旺角一間律師樓進行註冊儀式。簽紙儀式由Steven的爸爸和雯雯的媽媽主持，Steven的荷蘭籍媽咪、前歌手胞姊張詠恩和姊夫商台DJ Donald都沒出席，只有十多位親友觀禮，圈中人也僅見張彥博。
一心一意對太太
昨早約10時50分，身穿禮服的Steven抱着囝囝，和雯雯乘坐七人車抵達律師樓，雖然是大喜日子，但雯雯卻笑容欠奉。Steven則說：「我哋遲到啦，畀我哋上去先，阿仔有啲呆呆哋。」但記者拍照時，天寶眼仔睩睩十分精靈。儀式完成後，Steven約在11時40分先行落樓，問到是否很感動？滿頭大汗的他說：「緊張多啲，噚晚冇乜點瞓，加上阿仔有啲唔舒服，扭計唔肯瞓。」
Steven又表示沒有「愛的宣言」：「用行動去表達，呃咗佢好耐，其實我哋上年開始同居。」問到當時是否跟舊愛梁皓恩（April）同居？他否認：「已經搬走咗。」至於當時是否已跟April分手？他坦言：「未分，呢件事對好多人好困擾，但我會做番好，希望大家畀多次機會我，嚟緊我會畀阿仔有個好好嘅成長環境，對太太一心一意。」問雯雯感受時，她微笑說：「多謝。」再問對老公有冇信心？她點頭微笑。
相關新聞：【蘋聞重溫】陳奕迅囡囡做花女
儲錢明年搞婚禮
至於工作是否全部叫停？Steven說：「未完全停晒，過咗中秋會去象山拍一部內地電影。自己會改過反省自己，𠵱家每日照顧太太同個仔，一日三餐都係我煮，之前自己犯咗一個好大錯誤，對太太一定有影響，影響好多人，多謝身邊朋友不離不棄支持我。」Steven又表示會儲錢，待明年9月2日再搞婚禮。
問到簽紙有否通知關智斌？Steven說：「我冇通知好多人，唔想咁多人受到困擾。」他又代胞姊張詠恩解畫說：「本身家姐話趕過嚟，但佢好多嘢做，最終都係嚟唔到，媽咪就喺荷蘭趕唔切返嚟。」提到蔡卓妍及鍾欣潼在Ig取消關注，Steven坦言：「佢嬲我都好明白，想同佢哋講聲對唔住。」又說待事件平息後，會再跟她們道歉。Steven一家三口隨後與親友到佐敦一間酒樓飲茶，他沿途為老婆和囝囝擔遮擋雨。眾人約下午2時離去，Steven一家三口返抵旺角寓所樓下，抱實仔仔落車的Steven指自己好攰：「阿仔平時都好嗲。」然後兩公婆帶着氣球和鮮花上樓。
採訪：王連連
攝影：徐錦池、吳耀輝
|
鍾意就快D Share啦！
|
|
|
