41歲楊思琦早前宣佈大肚，並驚爆於今年年中已經在外地註冊，因為老公是圈外人，所以想保持低調，但不會退出娛樂圈。再度陀B的思琦妹今日與譚小環、李綺虹及向海嵐為ViuTV全新節目《香港親善小姐》出席記者會，身穿晚裝，高貴示人，目前懷孕的楊思琦，穿deep V湖水藍連身長裙，她們應記者要求影單人相時，思琦妹先坐下休息，見她上圍變得豐滿。
思琦妹接受訪問時，只透露懷孕已過3個月，有時會頭暈想嘔，她續道：「好開心！好難得，而家搵到愛的森林，喺外地註冊，今次真係雙喜臨門。」思琦妹指老公是中國人，但他在香港生活，透露是朋友介紹而認識，問到她老公的姓氏，思琦妹不願多談：「大家叫番我思琦就最親切。」思琦妹稱女兒卓穎（Krystal）知道自己要做家姐，思琦妹說：「大女覺得很開心，成日摸我個肚，又攬住我個肚嚟錫，因為佢成日都好想有朋友同佢玩，大女叫大寶寶，佢會同我個肚講：『細寶寶，我係姐姐，你要乖乖呀！』真係好懂事。」
思琦妹笑稱已知肚裡BB的性別，不過她想稍後公佈，暫時未決定在哪裡待產，平日也要照顧大女Krystal，她只說BB明年出世：「除非早咗，否則應該係鼠BB，而家工作都會繼續接嚟做，總之有就做喇。（打算產前幾時開始停工）有工作就做，我會做到最後。」被問結婚會唔會想老公養，思琦妹笑言：「吓！我哋經濟獨立㗎，自己都要努力，我哋現今女性財政要獨立。」講到將來要照顧兩位小朋友，思琦表示坐月時要keep好狀態，再出來跟大家見面，自認是工作狂。
問到會唔會再生B，思琦妹直言：「照顧好呢個先，順順利利搞呢個大project。」她亦表示自己婚後才懷孕：「同老公相處咗年幾，拍拖超過半年，跟住就結婚，老公對我好好，用心愛我，同大女都夾，因為佢都鍾意小朋友，相處得好好，（囡囡而家叫佢Daddy定Uncle）阿女而家叫名，遲啲就會改口。」被問老公有否留意她的緋聞或舊情，思琦妹笑笑口說：「佢知道，以前嘅事又唔係而家，總之而家開心囉，因為要拍嘢，所以冇戴戒指，婚紗相嗰啲影咗，睇吓遲啲發畀大家，我哋未擺酒，只係喺外地註冊，始終我哋想簡單啲。」思琦妹又指老公並不介意她婚後性感示人。
|
鍾意就快D Share啦！
|
|
|
