【娛樂人物】
林子博自2008年加入無綫後，主力做娛樂主播，偶爾拍攝劇集。數月前子博太太Shirley不幸患上罕見癌症，子博一人擔起整頭家，禍不單行，子博不獲無綫續約。慘食「無情雞」的他，幸好有一班「有情人」古天樂、汪明荃及張衞健等相助，雖然經濟陷入困境，但子博依然樂觀面對：「我又唔係冇手冇腳，最緊要有條命、有健康。」
採訪：戴彩煥
攝影：沈健程
場地提供：BARON 99
相關新聞：【做過亞視】求婚冇錢送鑽戒
現年48歲的林子博，過去11年在無綫娛樂新聞台做主播，跟太太Shirley公一份婆一份，一家四口生活雖不富裕，但知足。數個月前，這個幸福之家起了重大變化，跟子博結婚16年的Shirley，不幸患上極罕有的癌症「平滑肌肉瘤（腹腔）」第四期，癌細胞更擴散到肝、胰、肺及淋巴。Shirley為抗癌而辭去原來工作，子博一個人孭起整頭家，沒想到無綫決定本月1日約滿後，不再跟他續約，連家中唯一經濟支柱也倒下來。
| | |
張衞健錄音鼓勵
不過，一隻「無情雞」換來一班「有情人」，古天樂、汪明荃、鄭秀文、張衞健、薛家燕、鮑起靜、江美儀及張慧儀等，相熟的、不相熟的，一個個伸出援手，有些經濟上支持，助Shirley到美國就醫，有些介紹工作。子博日前接受《蘋果》專訪，他由衷感激說：「我呢11年喺娛樂新聞台係冇白過，你諗都諗唔到，我只不過訪問過兩次、三次，真係冇電話冇交情，但佢哋都有幫我。好似張衞健，佢搵我電話WhatsApp我，有好多鼓勵嘅說話同我講，甚至乎佢留言畀我太太，我太太聽完之後喊咗出嚟。佢話：『你要頂住呀，你一定會好番㗎，大帥哥會撐你呀！』」ViuTV方面已向子博招手，正如子博所講，天無絕人之路。
曾經有傳子博因為在社交網發表過黃絲言論才不獲無綫續約，子博已否認此說法，強調自己講子女講民生居多。他有否向公司了解過「真正死因」？他坦言：「冇問。我淨係諗個解決方法，當我遇到呢個問題，我諗：『我點樣同老婆講呢？』」Shirley聽到子博失業後曾經爆喊，直至看到支持留言，心情已平復下來：「我不停同佢講唔需要擔心，我又唔係冇手冇腳，最緊要有條命、有健康。」
相關新聞：太太患癌：覺得自己倒數緊
見病妻嘔嬲無綫
曾在亞視工作九年的子博，當年也是突然不獲續約，還因此而沒有能力供樓要賣樓，隨後加入東亞衛視最後執笠，又再失業，今次再度失業，子博說：「我一路都OK嘅，係唔開心，但冇話好激動或者喊。」子博續說：「冇一間公司係養你一世，雖然我冇刻意去嬲TVB，但當有啲畫面喺我面前出現嘅時候，我就會好嬲TVB，就係我睇住老婆攬住個廁所嘔，喺嗰一刻我就會諗：『TVB你做乜喺呢個時間搞我？你畀我過咗呢關先』」不少網民鬧無綫冷血，子博有另一番睇法：「只不過呢段時間我咁唔好彩，可能佢都有佢嘅難處，我唔係刻意幫佢諗，只不過令到我自己好過啲啫。」
Shirley現於東區醫院做化療，但頭兩次在私家醫院做化療，已將積蓄花得七七八八，失業的他又如何應付開支？子博樂觀說：「又唔係諗到咁絕望，我會做兼職。」子博10歲的囝囝卓楠，擔心媽咪知道爹哋失業後影響病情，天真到建議爹哋「扮返工」瞞媽咪，14歲的大女詠渝，也主動說做兼職幫補家計：「我話爹哋好快搵到嘢做嘅，你畀心機讀書已經夠。」今次可算是人生最大打擊？子博苦笑：「我希望係！唔好再嚟喇！」
|
鍾意就快D Share啦！
|
|
|
