【娛樂人物】近年一直在無綫默默耕耘的鄭敬基，近日疑因參加遊行及政治表態而不獲續約，前途未卜。無約一身輕的鄭敬基反而因最大的白色恐怖消失，沒有了大包袱後可以暢所欲言，精神及情緒獲得全面釋放，更慶幸自己不再怕因壓抑情感而「屈到病」，鄭敬基希望有藝人勇敢地站出來幫助有需要的人。
撰文：余燕儀
攝影：沈健程
場地提供：NEXT DOOR Cafe & Bar
相關新聞：與太太齊齊罷睇TVB
現年56歲的鄭敬基經歷移民再回流香港，效力無綫前後逾20年，但因7月跟太太參加元朗示威，更不時在社交網發聲，結果疑因此不獲無綫續約，明日播出的劇集《牛下女高音》成為他的告別作。日前鄭敬基接受《蘋果》專訪，他面帶陽光笑容地說：「我最大嘅白色恐怖冇咗！」至今仍未收到正式通知不獲續約？他說：「噚日我收到TVB一位PR嘅message，監製話有傳媒想同我做訪問，問我想唔想做？我問會唔會同其他演員一齊做？佢回覆：『因為未續約，應該唔會。』我唔知佢係咪代表公司答咗，呢個係最update版本。」不獲續約疑跟政治取態有關，鄭敬基抵死說：「我堅持寧願相信同政治無關，呢個留番佢哋出嚟答時有冇眨眼啦，你唔想人屈你，你唔好屈人，最好佢哋親自回答。」
| | |
唔使扮中立
離開無綫後，鄭敬基反而一身輕：「𠵱家輕鬆好多，好舒服，仲開心啲，好free，好似冇咗大包袱，起碼唔使驚患精神病情緒病，心諗到乜嘢都可以講出嚟，唔使因為生活，諗計仔避開、扮中立，你諗吓情緒係幾咁壓抑，𠵱家我最大嘅白色恐怖冇咗，我仍然有嘅財富係生存緊，有個好愛我，乜都支持我嘅太太，同屋企人同一價值觀呢樣係最難。」沒有合約綑綁的他更直認：「TVB新聞我未續約前已經冇睇，因為網上好多都係直擊直播，我好想知道香港最新嘅情況，喺比較客觀嘅角度去睇，而唔係只係一個。我唔係覺得TVB記者唔努力，但到底編採係咪咁自主呢？So far我見到近至對住學生開槍事件，佢（TVB）好快有定論，但新聞唔應該係定論或結論，信你先開住個台，我覺得責任更加前所未有咁大，將呢個時代嘅事實報道畀大家去睇。」
相關新聞：陳潔玲反惡法：官逼民反
「我好愛香港」
鄭敬基更呼籲其他藝人盡一分力：「我覺得藝人係好難得嘅身份，香港越嚟越易做藝人，去到𠵱家藝人身份唔係只唱隻歌畀你聽，喺適當時候需要幫有需要嘅人，原來藝人咁有用，唔係花瓶嚟，可以做到好多嘢。每個藝人我都呼籲，每個人識用隱藏方式，如擺花擺蠟燭，唔可以話有人做你就唔做，個個都話人哋做，咁邊個做呢？」
現在不少香港人想到移民問題，擁加拿大護照的鄭敬基表示：「以前冇諗過香港令我個人豐富咁多，公民意識係行到最前最強，呢樣令我好仰慕，我好愛香港，希望香港仍然好似以前咁自由，我未必會移民，但收到好窄嘅話，去每個地方唔係為安全，係有冇機會為其他人發聲，好多人冇得走。2047你揀乜？𠵱家要提前開始諗，你仲會唔會留喺度？我呢啲咁普通嘅人，又唔係好多財富，一個小演員，永遠唔會忘記呢刻！好希望每個香港人能夠有希望同盼望，唔好灰心，有頭髮邊個想做癩痢。」
|
鍾意就快D Share啦！
|
|
|
