黎振燁和朱智賢這對偷食男女自從醜事敗露後，連日上演一幕又一幕的鬧劇。飾演「暖男」的謝東閔，因幫偷食女友朱智賢頂罪，慘被封為「綠帽俠」，不過《蘋果》收到消息，「綠帽俠」原來亦曾試過兩次背朱智賢偷食小花，關係七國咁亂。
曾拍攝《3日2夜》的偷食女角朱智賢，三年前因拍節目《Big Boys歷險記》和謝東閔撻着，不過雙方一直未有承認戀情，只偷偷發展地下情。可是，在今次車廂偷食事件中，一直扮演「暖男」護女友的謝東閔，其實亦試過先後兩次背女友偷食。據知，謝東閔第一次偷食，是在和朱智賢剛開始拍拖不久，男方偷偷和同樣有份拍《3日2夜》節目的曾淑雅（Jumbo）暗撻，不過和朱智賢仍屬熱戀期的謝東閔，很快便將Jumbo這段霧水緣斬纜。到2018年，謝東閔有份拍大台劇《丫鬟大聯盟》，同樣有份拍此劇的靚湯湯洛雯，碰巧此時和拍拖4年的羅天宇分手。劇中她和謝東閔有多場對手戲，一向屬「戰鬥格型」的靚湯，明知謝東閔有女友，但剛甩拖的她，見有筍盤亦不惜施展迷暈攻勢，最終成功攻陷謝東閔。當時靚湯為新劇宣傳時，做訪問時便不避嫌大讚男方說：「佢（謝東閔）都OK嘅，高高大大，靚靚仔仔。」
左右逢源的謝東閔，由於和新歡湯洛雯打得火熱，少不免冷落朱智賢，感情一度冷卻，據知朱智賢當時仍未知有情敵湯洛雯的存在，只覺男友經常唔應機玩失蹤，因此她亦曾試過向好友訴苦，私疑男友「一腳踏兩船」。為了mark實男方，即使要到外地拍節目，朱智賢一有空檔即視訊對方，花了不少力氣才能踢走靚湯，成功箍贏男友，保着謝東閔女友的地位。
有指謝東閔之所以多女埋身，全因少爺仔家底厚。參加《超級巨聲2》入行的他，近年開始被大台力捧，唱歌之餘亦演過不少劇集，謝東閔家住青龍頭獨立屋，平時出入以160萬的積架代步，加上爸爸開髮型屋，媽媽就開外傭介紹所，自己亦在美孚開按摩店，因此身家有番咁上下，難怪被不少女藝人視為大台筍盤。對於背着朱智賢偷嗒湯洛雯和曾淑雅，謝東閔對此回覆說：「不是事實不回應啦謝謝」。至於被指介入謝東閔和朱智賢感情，湯洛雯回覆時表示：「完全冇咁嘅事」。至於Jumbo則回應說：「我唔明點解會咁傳，我係識謝東閔，都識咗幾年，係朋友介紹，但聚會都係一班人，未試過單獨約會，或者我之前同佢拍劇集，入面我做佢女朋友，所以先咁傳啦，總之我唔想有任何誤會」
其實今次偷食事件，間接令朱智賢和謝東閔的地下情關係浮面。男方護花之餘亦慘被封為「綠帽俠」。但原來二人表面看似恩愛，但有指未爆出偷食事件前，他們的感情已出現裂痕，只是還未攤牌講「分手」。不過今次女方有難，男方都肯捱義氣出面頂，算是分手前向女友「送大禮」。
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
