娛樂圈被疫情冰封，圈中不少具影響力的藝人，都在呢段時間，出手幫同業度過難關。其中古天樂更加係良心顧主，講明唔會炒人，公司上下齊心捱過「疫」境。
歌神阿Sam與郭富城網上開騷，出錢出力助停工零收入，並肩作戰的手足解困，疫情下有情有義。不過亦有藝人，偏偏在這個時候炒人。
據知，上年嫁給富三代吳啟楠，近日又袋九百萬片酬復工拍大陸劇的Janice Man(文詠珊)，為慳錢，竟然請仆心仆命跟她超過十年的助手阿霖食無情雞。一場疫情，可以患難見真情，亦可以是照妖鏡！
婚後的JM，不時被指在社交網炫富，將大埔比華利山大屋攝入鏡，生活富貴。有指與JM並肩作戰十幾年的助手阿霖，最近失業，徬徨向同行求助搵新工，應付供養父母及供樓的擔子。JM請助手食無情雞的事，因此在行內傳出。
有幕後爆料，JM去年中同洗米華旗下嘅太陽娛樂約滿後，要自掏荷包出糧給香港唯一員工，即是助手阿霖，自此覺得肉赤。
演藝界受疫情影響，工作幾近停頓，早排JM同其他藝人一樣，留在家中玩下煮飯仔兼拍片，有人覺得好似白白出糧好唔抵，於是懶理合作多年的助手，有家庭壓力，在一班閨密獻計下，以「覺得用女助手方便啲」為由，炒！繼而換一個正在失業，可以低薪入職的女助手。
做生意經營困境，開源節流無可厚非。不過疫情下仍有工開，有錢賺，卻在這時候炒人，難免令人感到冇情冇義，如同大台的作風。
知情者說，有人諗縮數，一度打算申請政府「保就業、創職位」計劃，希望攞政府每月$9000元，合共6個月$54000，作為助手的薪金，叫他多做兩個月，炒人都要度到盡。但後來知道申請補貼後，規定半年內不可以炒人，如意算盤打唔響，最後賠一個月代通知金，叫助手即走。
好多幕後知道盡責的阿霖，遭受如此對待，都替他不值！事關當年JM屬黎明旗下藝人時，助手阿霖已經負責照顧她與衞蘭。之後JM跳槽到太陽娛樂，兼自立門戶開workshop，她找阿霖過檔，陪伴打江山。
一早飲北水的她，幾年間阿霖陪她在大陸吸金，賺不少人仔。單是內地劇已拍咗九部，其中有《畢業歌》、《蜀山戰紀之劍俠傳奇》、《九州.海上牧雲記》、《風聲》，《天龍八部》等。最近復工，與林峯合作，王晶監製的《倚天屠龍記》，有傳片酬已去到接近900萬人仔，水頭充足。
而JM老公吳啟楠的家族，在汕頭有頭有面，身家豐厚，吳父在當地開免稅店，而吳啟楠則與前財爺梁錦松拍檔，做儲物箱生意。
有夫家照住，自己又賺不少，手揸17年以$1038萬買下的跑馬地匯翠臺，亦有升值，JM財力不弱，在香港養一個助手，斷估不會感吃力。
雖然行內人均替阿霖不值，但塞翁失馬，焉知非福，事關打JM工唔易頂！有傳她在內地助手圈子，是出名惡啃。有傳短短幾年，JM大大話話換了十個內地助手，大部分是對方劈炮唔撈，有兩個更在她拍劇中途，頂佢唔順劈炮走人。
有指算死草的JM，要求內地助手，上至陪開工，下至洗衫都要做，故助手圈子有經驗那班，已聞JM色變，加上出手低，現在她只能在內地請到經驗淺的新人工作。
話說有次內地劇組休息，JM不用開工，但內地助手就無得停手，要幫她洗衫！不過她的衫褲，在平日卻是拿去酒店的免費洗衣服務。不想嘥米飯，就要駛到盡？
有年的農曆新年，當時仍是男友身份的吳啟楠，欲派開工利是給她助手，怎知遭JM阻止，一分一毫，滴水不漏。
內地片場飯盒，出名難食，故JM在內地開工會請私家廚跟身，善待自己。不少幕後見過JM開飯奇景，她與助手同枱食飯，卻如兩個世界，助手啃片場飯盒，她則大魚大肉，但助手不能開心share。源於階級觀念，還是覺得share，是蝕本？
本刊聯絡剛版JM解僱的助手阿霖求證，佢承認剛剛離職。當追問這段日子，慘食JM無情雞，是否感到冇情冇義時，阿霖不置可否，就匆匆收線。
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
|
鍾意就快D Share啦！
|
|
|
