2020年6月19日星期五

【技癢點好】離開樂壇23年黎珈而忘形唱K唔知被偷影

黎珈而喺飯局中獻聲，相當動聽，令人懷念她昔日歌聲。

現年48歲「最美麗的CEO」黎姿（黎珈而Gigi），自從結婚後就被私有化，以家庭及打理美容王國為主，絕跡幕前，不過，由14歲就加入娛樂圈嘅Gigi點會冇技癢，雖然冇公開唱歌，但喺私下飯局，都會開金口獻聲，每次都掌聲雷動，好似開show咁㗎。

昨晚Gigi喺IG上載唱歌短片，戴住眼鏡，身穿黑色casual wear嘅Gigi喺宴會中，演繹關淑怡嘅經典歌《一首獨唱的歌》。Gigi喺1997年，以性感與誘惑造型推出國語唱片《給你吧》後，就唔再唱歌去咗拍戲。不過，唱功同外形一樣，多年不變，勁正。片中Gigi企喺度，雙手緊握枝咪，一臉認真，唱得好Enjoy，投入到連朋友偷拍都唔知，勁滿足，她寫道：「那晚大家興高采烈，就連唱K給朋友錄影我亦不為意。很久沒有聽自己的歌聲，勾起白恤衫的時候，希望這片段沒有嚇到大家。#一首獨唱的歌 #白恤衫」

雖然只得幾句，但Fans們都聽出耳油，唔少粉絲好懷念她的劇作及舊歌，大讚好正，有人要求聽全首，有fans留言：「真的有嚇到大家！太好聼了！」連樂壇天后鄭秀文都關注留言話：「大開金口。嘻嘻！」