2020年6月19日星期五

【頭條獨家】仔大女大各自玩王敏德好彩有老婆陪放狗 #王敏德

【頭條獨家】仔大女大各自玩王敏德好彩有老婆陪放狗

王敏德同隻狗玩波波，仲好開心咁同佢影相。

王敏德(Michael)有份拍嘅TVB劇《飛虎之雷霆極戰》就快播完，唔使忙宣傳又未有工開，所以Michael呢期都好得閒，但仔大女大有工作有拖拍大把嘢玩，唔會成日陪住佢，好彩仲有老婆。日前下晝，王氏夫婦去咗數碼港公園放狗，男嘅負責湊狗，女嘅負責睇住啲嘢，玩咗個幾鐘就返歸。

採訪:譚壹致

55歲王敏德有兩女一子，兩個女見報率都好高，日前二女王麗嘉(Irisa)出席活動，提到疫情下反而瘦咗，仲連上圍都縮咗水，她說：「連媽媽（馬詩慧）都咁講，但我覺得仲可以細少少，一向都覺得太大。」咁嘅話題見報率點會唔高吖。之後Irisa透露聽日父親節會陪爸爸打Golf又會同姐弟夾錢送打Golf嘅專用手錶做父親節禮物。

Michael係咁幫狗放電

當日下晝三點，王氏夫婦帶住Irisa隻法國鬥牛犬Johnston揸車去到數碼港公園，到達不久就遇到朋友，三人一狗係公園Hea咗個幾鐘。王敏德主力陪隻狗跑、追住隻狗、拋波畀狗同埋幫隻狗影相，放電量極高，相信隻狗當晚應該好好瞓，王敏德應該都一樣。而王太就舒服啲，因為佢負責坐低睇住啲袋、餵狗狗食零食同埋睇老公影狗狗後嘅作品，出汗量唔高，可以除低口罩呼吸新鮮空氣，兩公婆都好滿足，留咗個幾鐘就返屋企。