機會是留給有準備的人。61歲的艾威，上半生停留在一間電視台，34年來一直安份守己地工作，始終在事業上浮沉不前；直到2013年，當時54歲的艾威決定離開無綫，轉投王維基新開設的港視，令他事業上有重大突破，不過最後因為「一男子」因素，港視發牌夢碎，但今次未有打沉艾威的事業，這幾年間有不少新嘗試，做過電影男主角，又試過出書分享賭錢秘訣，甚至還北上登台搵真銀。但人生總有不如意的事，因為武漢肺炎肆虐全球，確診人數不斷上升，經濟嚴重受損，在疫情下有人冇工開，艾威便是其中一人：「我由今年舊曆（新）年之前已經停咗，酒吧冇生意，冇嘢做，坐咗半年，好誇張，真係未試過，就算喺港視走，出面都有啲嘢做。」
不過艾威未有因此而氣餒：「我唔係好贊成啲人怨天怨地，喺屋企坐到肥晒，我一定唔會畀自己做呢啲嘢，一定要將自己保持最佳狀態，要有精神，先可以思想清晰去應付問題。應該就快坐完，而家有啲嘢傾緊，會試吓玩抖音，好似好虛幻，無端端走去拍短片。」最近艾威有份參與的《中佬唔易做》在ViuTV播出，61歲的他笑說自己已不是中佬，但他覺得人到中年，總是有人覺得危機是面對生活上的轉變，不過他反而覺得最大問題是面對身體機能的衰退：「我而家身體機能暫時尚好，老花都未有，我身邊啲朋友有百分之九十九都有，我講出嚟冇人信。喺呢段時間，心態係好重要，我自己意志力好強，一定要好好鍛煉身體，對演戲都有幫助。」
提到回春秘笈，艾威表示要先從飲食方面開始：「平時我早餐係3隻雞蛋、一碗麥皮，中午就大魚大肉，夜晚食豆類製品，好多時係食3嚿豆腐，當然紅酒係唔少得，做運動都唔少得，如果天氣好去沙灘跑45分鐘。」而心態上，艾威亦喜歡與年輕人相處，前年他去了浸會大學教書，對人生有很大得着：「而家新一代好有自己嘅諗法，同我哋以前好唔同，但係千祈唔好同佢哋講以前，亦都唔好當自己係前輩，我以前同蝦叔（關海山）一齊，甚少聽到佢講以前，唔好話而家啲後生唔鍾意，我哋以前後生都唔鍾意。不過嗰陣我都執過自己嘅file，有少少擔心自己啲料唔夠。」
查實艾威的人生閱歷很豐富，在Google搜尋器上，記載了不少他的經歷，他笑說：「豐富只係呢幾年，以前喺舊公司，真係唔識點形容，唔會餓死，但係完全冇突破，我相信對每一個演員嚟講，都會要求有突破，如果冇突破，做一日人同做10日人都冇分別，不如早啲埋單搞掂自己算數，做乜要嘥咁多米飯？」他還說：「我唔係要安樂窩，對我嚟講要有突破，所以嗰陣王生（王維基）搵我，我係完全冇考慮就過去，一定過硬。呢個係做人嘅正確抉擇，有啲人成日問我有冇後悔，點解我要後悔呢？呢幾年精采過以前19幾倍，我數手指，超過10樣嘢係以前未做過，好似綜藝節目司儀、電台主持、探險節目主持、上《鏗鏘集》、出書、烹飪節目嘉賓、拍電視廣告、電影同電視男主角同埋返大陸做舞台劇。」
之不過與他同期離開無綫的藝人，有不少已經回巢拍劇，但至今仍未聽過艾威回巢：「點解？緣份未到啩，之前係有人搵過，不過其他人過唔到，我嘅經理人公司打開門做生意，控制權唔喺我哋手上，冇話乜嘢公司唔拍。」
撰文：唐琛悠
攝影：郭賢興、林德雄、周樂恒
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
