2020年7月18日星期六

獨自留守酒店過生日「索汶希」收容祖兒茅台酒蛋糕好驚喜 #容祖兒

獨自留守酒店過生日「索汶希」收容祖兒茅台酒蛋糕好驚喜

Mani興奮同祖兒送嚟嘅茅台酒造型蛋糕玩自拍，相中點睇都睇唔出Mani真實年紀。

昨日係英皇高層「索汶希」霍汶希（Mani）48歲生日，因為霍汶希要陪旗下藝人容祖兒(Joey)、蔡卓妍(Sa)與鍾欣潼(阿嬌)返內地商演，所以齊齊要分開隔離，雖然入住同一間酒店，但不能見面。因此今年生日，Mani靜悄悄一個人在房內度過，好彩Mani人緣好，好多朋友送來花束、生日蛋糕及小龍蝦，暖在心頭，最搞鬼蛋糕寫住「索汶希生日快樂」，連Mani都忍唔住話：「朋友話，落單訂蛋糕明明講係霍汶希，唔知點解變咗索汶希，真係笑爆嘴！一個人點食得晒呀？今年生日真係驚喜。感謝各方有心人在我躲在洞穴中時送上生日祝福及禮物，你們的心意我全收到了，多謝你們令我度過了難忘的一個人晚上。」

好戲還在後頭，容祖兒送來嘅茅台酒造型蛋糕掀起高潮，還抵死留言：「願你有酒可以醉，願你醒後有人陪，祝親愛的老矛生日快樂！」穿藍白格仔睡衣嘅Mani開心到同蛋糕自拍，留言：「其實一個人過生日都幾正，尤其係呢排病菌肆虐，減少聚會不失為保護自己保護家人朋友嘅好方法。#著睡衣吹蛋糕真係好梳乎#特別鳴謝#容祖祖#送我茅台#是咪覺得我係酒鬼#我準備好去劈茅台啦#老母愛你」Sa回應「Nice cake」、何嘉莉大讚：「素顏靚到殺死人！」、甚至有網友話：「今日你最靚，靚過英皇所有女藝人。」