- 藍藝人「守得雲開」 曹永廉接受黨媒訪問談國安法：反對係存心搞事，要控制佢哋
- 16小時前
TVB藝人曹永廉，其愛國撐警藍絲形象，終於「守得雲開」，成功獲得黨媒——人民網香港「加持」，同佢做咗個訪問，談暴亂、講撐警、聊國安等等。曹永廉仲話身教自己兒女，一齊去探警察。咦！佢對仔女好似都係加拿大籍，外國人嚟㗎喎！仲有佢老婆姜依蘭、外父外母姜大偉同李琳琳，都係加拿大籍。成家都係外國人，得曹永廉仍然係中國人，難怪佢喺訪問咁自豪地講：
「我係土生土長中國人，雖然我喺香港出世，但我係中國人。我阿爺、阿爸、任何祖宗都係中國人，我唔可以唔認自己係中國人。我係中國人，我一定要支持返自己中國。
「我見到上年有好多暴亂事件，影響身邊好多人，影響到我思維、身體。我亦都識好多警察，我知道佢哋好大壓力，我覺得係需要畀少少鼓勵佢哋。其實上年我哋成日都會送嘢去啲警察部門，但我哋好低調，因為大家都知道上年啲暴徒好緊要(指行為偏激)，佢真係會做好多嘢攻擊你。咁我亦都選擇咗用一個低調、唔想俾人知道嘅情況去支持警察，買嘢去、同佢哋食嘢、影吓相鼓勵下。
「我以前細個嘅時候成日都會去內地，因為我好多屋企人都喺廣州，我會接觸到好多(關於內地)，睇住佢不停進步，係睇到我哋國家喺度進步。
「國安法係好正常嘅一個法，每一個國家都有，你點會畀一班喺度搞事、搞亂香港嘅人喺度生存，亦都知道佢哋搞緊事，都唔加個『鎖』去鎖住佢？我自己屋企加個鎖關你其他地方咩事呢其實？咁依個真係好奇怪，依家啲人反對可能佢哋存心想搞事，我覺得應該要控制佢哋。我知道好多人支持，好多人支持國安法，希望做咗之後一步一步好。
「上年開始公開咗立場，第二日即刻被好多代言同我講，話大家唔好合作。其實，好老實，我依家都想講返，所有代言都對我好好，所有代言都係好人，只係我嗰日出咗呢啲新聞，媒體呀、嗰啲人攻擊佢(代言商)，一日有萬幾人攻擊佢，又話放火燒佢間舖、又要打爛佢間舖。我同個客商量『不如你同我算啦』，我哋要表明大家唔好合作，唔好影響到個客，我係擔心影響到人。呢個我好理解，所以我無後悔，依家行咗出嚟，我覺得自己對家庭、對屋企人有個交代。對我小朋友，我畀咗個正確諗法佢，依樣嘢你係有錢都攞唔到。我用好多身教，所以我小朋友係好乖，佢同我一齊去探警察。其實我同太太都好正常，一定會解釋晒成件事畀佢睇，無論你要爭取咩嘢都唔可以用暴力。
「每個人都要經過艱難，或者你真係付出過，為香港、為中國付出過，我希望得到返一啲嘢，你可以有咁嘅希望。但如果你無付出過，你希望啲咩呢？其實你為國家做過咩嘢呢？就算而家香港班後生仔，你為香港做過咩嘢呢？你無為香港做過嘢，但你想要求好多好多嘢，呢樣係唔啱。」
----------------------------
無懼白色恐怖 黎智英劉細良開講抗港版国安法
立即收看ChannelNEXT《人民學堂》
----------------------------
全新「和你撐計劃」 專享獨家禮遇 實際行動支持按此了解更多
壹呼百應 號召有心人 請香港人睇壹週刊按此了解更多
-----------------------------
【昔日紙本檔案庫】
30年壹仔經典 壹壹重現！
|
鍾意就快D Share啦！
|
|
|
