2020年7月25日星期六

【頭條獨家】分享食鹽助殺菌惹網友爭議施匡翹被恥笑冇腦教壞人 #施匡翹

【頭條獨家】分享食鹽助殺菌惹網友爭議施匡翹被恥笑冇腦教壞人

施匡翹心平氣和向網民澄清，要求醫院膳食加鹽的誤傳，但她強調冇嬲嬲豬。

現年24歲嘅女歌手施匡翹日前確診新冠肺炎，昨日入院第6天進展良好，驗血及血壓都好正常。由於她聽說用鹽漱口及飲用有助殺菌，故家人帶了一包食鹽去醫院給她使用，日前仲影埋相公開分享。豈料惹來爭論，昨日喺討論區有人出post，標題為「確診女藝人施匡翹要求醫院膳食加鹽，認為可以抗冠肺」，文中提到有關消息由施匡翹的幾名同房病人透露，講到言之鑿鑿。

因為食鹽抗肺炎太反智所以引嚟網民熱烈回應，指施匡翹冇腦盲搶鹽、反問她使唔使加醋？又說「如果佢認為方法可以抗到炎，就唔使喺醫院張牀度，要求膳食度加鹽」、「擁幼師資格誤人子弟」、「畀枝滴露佢嗱吓個肺可以消炎」、「不如食鹽唔好食藥」...由於評語都幾難聽，施匡翹不甘被誤解忍唔住回應網民：「我從來冇要求過在膳食加鹽，希望大家在未知真實情況下不要輕信謠言！」

不過，呢場搶鹽小風波未有隨她挺身回應而停止，網友繼續發功力斥：「做藝人同公眾人物，有時要慎言慎行，鹽真係不掌握用途及份量，攝取過多對身體係有影響，喺呢個時勢，唔確實嘅方法都唔好教人，最安全只能戴口罩同洗手，染病了只好聽醫生話！」不過，都有人幫口話醫院飯餸係冇味嘅，又有人post返中醫博士喺港台節目訪問內容，力挺的確有專家咁提過，施匡翹都係參考吓啫！

至於施匡翹公司發言人陳小姐就代為回應，表示有人教她用鹽水漱口及食用係有消炎殺菌作用，家人便帶咗包食鹽給她，當日開始用鹽水漱口，因為已備有私伙鹽，根本冇需要再向院方取鹽，目前她需要休息，請網民不要胡亂猜測指她盲搶鹽，而且她有常識的，沒有將鹽額外加入食物內。最後更指出施匡翹同房只有一位女病人，並非網傳的「有幾名同房病人」，大喇叭係邊位?謎底已經解開。