俗語話「女追男，隔層紗」，比喻女仔主動出擊追求男性，會比男追女容易，但放喺現今社會，歌仔未必一樣咁唱，但會主動出擊嘅女仔已經唔難搵，不過，事實係咪又真係咁易？
近日陳瀅接受無綫網上節目《Tiger’s Talk》訪問，同場仲有方力申（小方）及唐詩詠做嘉賓，席間講到各人嘅戀愛話題，Bob大爆原來小方甚少約女仔單獨出街食飯，陳瀅即揭小方約過自己，但最後冇食到。而陳瀅更爆小方推介一個星座專家畀自己，嗰位師傅話佢2023、2024年會同個點點點嘅男士結婚，事後同小方講返，發現有唔少條件都同小方脗合，加上嗰位師傅畀小方嘅贈言又差唔多，陳瀅講笑話覺得係小方收買咗個師傅。
陳瀅被問到理想對象，佢即指向相隔一個人身位嘅小方，陳瀅大讚小方心地好，外型又好，主持人林盛斌（Bob）同伍詠薇（伍姑娘）乘機狂撥媒人扇，小方似乎唔知乜料，所以半呆當場，而陳瀅就已經主動除低手上戒指交畀小方，更主動遞埋手去畀小方，等小方幫自己戴戒指。
小方唔郁，陳瀅情緒明顯好high，不停大笑，又同小方講：「畀埋你喇，唔使你買呀！」其間，就連坐喺兩人中間嘅唐詩詠都忍唔住出聲同小方講：「你可唔可以大膽啲？」
儍更更拎住陳瀅隻戒指嘅小方一臉尷尬，佢帶啲口窒窒話唔知陳瀅邊句真、邊句假，唐詩詠同阿Bob都叫小方當真，伍姑娘亦勸小方「最緊要自己開心」，而阿Bob反應激動，話小方：「陳瀅咁好你都唔鍾意，正人渣！」主動出擊嘅陳瀅一路遞出隻手等小方畀反應，但小方都係唔郁，被伍姑娘鬧佢：「冇鬼用㗎你真係！」
後來唐詩詠同小方調位坐，等小方同陳瀅坐埋一齊，陳瀅已經笑到停唔到，又不停拍打小方手臂，雖然Bob同小方辯稱陳瀅「好戲」，但伍姑娘直指陳瀅係真‧鍾意小方。此時，陳瀅直認不諱：「我都話係咯，我都唔知點解你質疑我……」然後伍姑娘等人離場，話要將個場交畀「方生方太」。
被擺上枱嘅小方攞起枱上酒杯飲酒「定驚」，估唔到陳瀅主動舉杯，再蹺小方隻手嚟個合巹交杯，小方驚訝到睩大雙眼，阿Bob喺鏡頭外高呼，而陳瀅已經笑到走晒樣。訪問出街後，不少網民都話陳瀅明冧方力申。
睇返資料，陳瀅同方力申喺2017年已經傳過緋聞，當時有報道指陳瀅跟已故賭王何鴻燊嘅四房公子何猷亨甩拖，好姊妹糖妹（黃山怡）為陳瀅做紅娘，穿針引線約小方同陳瀅食飯，同場雖然有其他朋友，但大家都相當識做，冇打擾陳瀅同小方，惟2人冇下文。
原本男未婚，女未嫁，大家都仲available的話，拉埋一齊未必係壞事，不過，身為「宅男女神」嘅陳瀅，其實有個競爭對手，就係近年上位嘅「氣質女神」蘇皓兒（Chloe），Chloe不單做過小方師妹，又一齊拍過MV，甚至為小方獻上螢幕初吻，Chloe曾坦言小方係自己理想男友型，兩人亦傳過緋聞。
表面睇30歲嘅陳瀅同26歲嘅Chloe，2個女神爭40歲「飛魚王子」小方，但呢個幾何關係圖，其實仲要加多「一角」——現年27歲嘅猷亨。陳瀅同猷亨掟煲唔掟蓋，再見後繼續做朋友，近日更盛傳佢同陳瀅翻撻，當年陳瀅同猷亨拍拖時，已獲四太梁安琪「開綠燈」，而陳瀅早前更不避嫌以家屬身份出席賭王喪禮，可見佢深得何家人喜愛。
到底呢條幾何學問題，最終答案會係咩呢？
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
