足球博彩神器，每日重心提供盡在《彩報》：http://win.on.cc/football/
美斯要求離開巴塞隆拿嘅消息震撼球壇，合約糾紛更加搞到滿城風雨，眾所周知美斯出現離心，好大程度係對會長巴度美奧嘅不滿，就喺呢個風頭火勢時間，據報加泰羅尼亞警方近日正調查巴度美奧貪污同瀆職罪，極可能將呢粒「美斯眼中釘」打落台，令美斯留隊機會大大增加。
據西班牙第2大報章《世界報》報道，加泰羅尼亞警方就今年初爆出嘅「巴塞門」展開調查，準備向巴度美奧提出檢控，今年年初有西班牙媒體獲得巴塞隆拿內部流出文件，指巴度美奧用高於市價6倍嘅100萬歐元，聘用社交媒體監察公司I3 Ventures，專門負責抹黑巴度美奧嘅會長競選對手，以及部份反對自己嘅球員，當中就包括美斯、碧基等巨星。
《世界報》指加泰羅尼亞警方懷疑巴度美奧以權謀私，而且當中有可能出現「經濟犯罪」，預料今次調查會盡快完成，並會即時決定係咪正式向巴度美奧提出檢控。如果巴度美奧捲入官司，巴塞隆拿會長職位幾乎肯定坐唔住，美斯留隊嘅「大團圓結局」好可能上演。
來源 source: http://hk.on.cc
|
鍾意就快D Share啦！
|
|
|
