2020年9月5日星期六

【頭條戲場】《屍殺半島》喪屍原來係一個不錯的路障 #屍殺半島

【頭條戲場】《屍殺半島》喪屍原來係一個不錯的路障

戲中李貞賢大女李蕊揸車超辣，仲會用會着燈嘅搖控車玩班喪屍。

因為《屍殺列車》所以好恨睇續集《屍殺半島》，戲院重開即入場，雖然負評好多，但我又唔覺得差到咁，事關我終極入場目標係睇男主角姜棟元，由頭帶到尾，又跑得又打得又有樣，着軍服有型，揸槍又格，不捨姐夫之情又點到即止，我本人就相當滿意，至於抄足《末日先鋒：戰甲飛車》的飛車場面多過喪屍咬人?硬煽情完全冇感動位?我又唔覺得咁大問題，而且對於導演用喪屍做路障呢點亦非常欣賞，係呀，其實套戲唔係講喪屍㗎。(上映中)撰文:廖思慧

《屍殺半島》設定喺《屍殺列車》嘅4年後，因為屍毒蔓延至全韓國，半日已淪為死城，退伍軍人正錫(姜棟元飾)同家人及一堆死剩種上咗最後一艘難民船，但上船冇耐就有人感染屍毒，原本難民船駛往日本，但被拒入境，最終獲香港收容。其實全片最離譜係呢點，點解要香港接收難民呀?

真係以為睇緊《狂野時速》

最終姜棟元以「半島難民」身分在香港生活，之後被一班唔知咩人召回南韓偷巨額美金，然後就展開成套戲嘅重點，姜棟元返韓國攞美金、見到好多喪屍、有一班走唔到嘅軍人變晒人渣、姜棟元遇到曾經見死不救嘅李貞賢母女、跟住好多好多好多飛車場面、喪屍做晒路障。導演延尚昊表示：「《屍殺半島》是比較傾向『後末日電影』(post-apocalypse genre)的類別，呢個類別總係透過萬物毀滅、秩序重組嘅設定嚟突出人道主義，我極力嘗試喺呢部戲表現呢種特色。」導演好想靠《屍殺半島》帶出人性比喪屍病毒更可怕，其實香港人都知咗一段時間。