今年45歲的杜如風，出名爽直又玩得，可是由於太過男仔頭，異性朋友個個當她是brother，難怪至今仍是盛女一名。日前她接受《蘋果》訪問，坦言8年冇拖拍，就連杜媽媽都早早放棄，不再催她結婚嫁人。「好dry呀，點算？整大個灶罅囉，堅冇人追，追債可能有，我叫Helen，班friend叫我『倫仔』就知啦，佢哋都當我係男仔。」杜如風直言至今仍渴望愛情，但就不會主動出擊：「唔係唔想拍拖，係唔知去邊度搵，出親嚟食飯都係固定咗嗰班朋友，個個結晒婚啦，唔通我行出街問人『喂，你有冇女朋友呀？我啱唔啱你？』咁咩？」
姊弟戀一年玩完
雖然仍未找到另一半，但杜如風過往一直頗受異性歡迎，更試過同黃又南、「Figure王」Eric So、導演郭子健、余文樂傳緋聞，尤其又南，緋聞傳足13年，但每次問起二人都大耍太極，因此戀情至今仍是一個謎，誰知問杜如風，她竟爽快說：「係呀，拍過拖！」追問下，原來二人早於未入行前曾經拍拖。「佢16、17歲嗰陣住我屋企附近，所以佢未入行前我已經識佢，因為成班人一齊玩，成日見，我冇車，佢又住我隔籬，玩完咪兜我返屋企囉，兜兜吓咪兜咗上佢屋企囉。所以當年傳我哋拍拖嗰陣，其實我哋已經分咗手好耐喇！」姊弟戀相差8年，問杜如風是否奪走又南的puppy love，她踢爆前度說：「梗係唔係啦，佢媾女媾得好勁㗎！」杜如風透露和又南當年拍拖，未夠一年便分手，現時雙方已昇華至親戚關係。
賣日本健康食品開源
武漢肺炎令熱愛旅遊的港人無法出門，對「日本通」杜如風來說，更是叫苦連天。以往她每年最少「返鄉下」3、4次進貢，可是在疫情下，欲「飛」不能。杜如風坦言冇得飛最痛苦並非冇得shopping，而是不能約朋友見面。「慘呀，好掛住嗰邊啲朋友，啲藥都大鑊㗎，日本啲藥冇得出口，我由細到大搽開嗰隻濕疹膏，而家都差唔多用完，都唔知點算！」
疫情下，製作少，圈中不少藝人收入大減，杜如風亦難逃「缺水」命運，但又撇唔甩大使習慣，難以節流下，惟有嘗試開源。除了數年前在網上售賣自家設計品牌服裝外，她最近亦引入日本傳統健康食品，售賣用米、米麴和水發酵而成的甘酒、沙律醋、抹茶粉和鰹魚零食等。「日本人同人做生意好嚴謹，驚你搞彎佢盤生意，我咁啱識得賣甘酒嗰對夫婦，試過佢啲產品，覺得好OK，佢哋又信得過我，咪一拍即合囉！」事實上，杜如風因濕疹而要長期服用類固醇，導致身形腫脹，曾自嘲「肥過部貨車」的她，早前開始轉食健康食品改善體質，身體好了，體重亦應聲回落。
網購試過月使10萬
過往碌卡shopping是杜如風指定動作，見靚就買，睇啱就碌。多年積存下，家中的衣帽間，雜物堆了一座小山。更甚是自比衣帽間如亂葬崗的她，試過買完一個袋，搵唔到以為自己冇買過，結果又會花錢買同一個款，諸如此類情況，時有發生。但在疫情下，亦要慳住買。「以前1個月收入，會用120%買嘢，因為有老竇幫手找數，而家都會買，但因為少咗好多閒錢，所以要重點出擊，唔等使嘅嘢唔會買。」雖說是重點出擊，但因疫情而改變用網購方式的她，似乎又陷入另一個使錢模式中，她透露試過單月網購便花了超過10萬以上。問到會否出讓家中心頭好應付「疫境」，杜如風聲線即時高8度：「唔會，啲Vintage CHANEL一定唔會賣，其實有好多升值咗1倍以上，但我都唔想放，唔捨得呀！」
採訪：王梓嫚
攝影：仇志德
攝錄：馮嘉銘
化妝：Jenny Tziong
場地提供：鐵板燒海賀
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
