劉德華在新戲《熱血合唱團》飾演合唱團指揮，率領一眾飾演問題學生的新演員，包括林愷鈴（Ashley）及伍詠詩等演出。華仔當初只是擔任監製，並找素人演指揮家，華仔說：「導演氹我話我好似指揮家，叫我一定要學，於是我揾兒童合唱團指揮家，跟佢哋學習3個月。」今次與一班年輕新演員合作，華仔發現他們每個都有自己的表達方式，華仔說：「揾到自己嘅方向，一定會成為自己生命中嘅主角，今次同佢哋一齊，我學到保持青春嘅能力，俾一班年輕人包圍住，自己好有存在感、好享受。」
龔慈恩20歲女兒林愷鈴，戲中是個迷失、內心恐懼、愛情至上的中學生，有場戲鬧分手傷心而用鎅刀傷害自己，Ashley說：「我攞起把鎅刀唔知點解就好傷感，一個人有幾痛至會鎅傷自己皮膚，可能係好大痛苦，我哋忽略咗幾多身邊感到痛苦嘅人，而我哋睇唔到，自己拍完都有少少唔開心。」她自認現實中是理性到極點的女孩，並非愛情至上，對所有事情更會理性分析，只寄情工作及學業，對愛情沒半點興趣與好奇。Ashley又指自己很忙冇時間拍拖，並非家教嚴或自己乖：「我連瞓覺時間都冇，對追求者比較遲鈍，未必分得好清，順其自然，冇去規劃。」
Ashley自言拍戲感到很大壓力，尤其面對長長對白，幸得到華仔幫助：「我拍呢部電影時讀緊中學，基本上同我角色一樣好忙，4點放學就有劇組車嚟接我，孭住書包着住旗袍就上車去拍戲，5點半拍到夜晚12點，返到屋企做功課做到3點，7點鐘起身又返學，嗰段時間維持大概3個月，成部電影同我中學回憶融為一體。」龔慈恩有豐富演戲經驗，但卻對女兒沒有太多指點，Ashley說：「以為媽咪喺演戲上會提點我，中間遇到困惑時我有問媽咪，但佢唔係教我太多嘢，佢話呢一刻畀觀眾睇嘅，唔係我有咩演技，最寶貴係我哋嘅熱誠、真誠，年輕人嘅青春，叫我擺個心落去演，觀眾就會有感覺。」
伍詠詩戲中飾演住在劏房的低下階層，年紀較大的爸爸尹揚明，娶了一個年輕繼母，再生了一個BB，屋企經濟壓力巨大，她為滿足自己Cosplay夢想，會返兼職並幫補家計，她說：「戲入面嘅尹揚明同我爸爸感覺好似，好大男人，唔識得表達對自己個女嘅感情。爸爸唔會表達自己情緒，或者會將自己嘅情緒發洩落我身上，大個就知道爸爸係唔識得表達，但其實佢係愛我，我都嘗試同佢溝通，而家會同佢食飯傾偈。爸爸畀我自由度好大，佢支持我做鍾意做嘅嘢，我入行4年，作為新演員收入都唔穩定，中學畢業之後都有做兼職，唔想爸爸擔心要用屋企人錢，有能力都想畀爸爸有更好的生活。」詠詩又稱讚華仔很會搞氣氛：「華仔演嬲時，感覺佢有啲真係嬲，令我哋感覺真係呆咗，我哋個反應都係真。」
林愷鈴
化妝：Zoey Chin
髮型：Owen Ko@zoey chin beauty
伍詠詩
化妝：carmencmakeup_hair
髮型：Tim Lee @ Hair Culture
造型：BHISAN RAI （@styledbybhisan）
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
