陳果今年執導的電影《墮胎師》再次入圍台灣金馬獎問鼎最佳導演獎，回想23年前帶着《香港製造》參加台灣第34屆金馬獎，同年參賽港片有陳可辛《甜蜜蜜》及王家衛《春光乍洩》，強敵當前他最後贏得最佳導演獎。陳果自言當時仍是𡃁仔一名，抱住玩樂心情出席，他回想說︰「心情忐忐忑忑都諗住冇，點知逐個名講出嚟，自己贏埋，當時傻咗，因為諗住嚟趁熱鬧，估唔到攞咗最佳編劇同導演獎。」當時沒有準備台辭，所以上到台講的不多，自己亦未去到好老成江湖味的層次。陳果表示得獎無疑有鼓勵作用，特別對新導演，就算今時今日，每趟知道入圍都會有陣莫名振奮。
談到台灣金馬獎跟香港電影金像獎，在華語片世界都是舉足輕重，陳果表示兩者在評審上有不同，以當年參加金馬獎為例，自己的《香港製造》是細片算是弱勢，陳可辛同王家衛的作品自然是強勢大片，他說︰「金馬又畀咗我，你計返呢幾十年佢畀啲戲，有啲藝術氣質嘅戲都會畀，只要係好睇。因為主流太容易，金馬獎有少少歐洲電影節味道，唔係純商業。當然商業拍得好都會攞，譬如當年我攞最佳導演，陳可辛《甜蜜蜜》攞最佳影片。」他認為《甜蜜蜜》雖然是主流片，但說的都是人文關懷，結構如早兩年的《淪落人》︰「金馬獎在意義上比起金像獎會好啲，評審嚟講金馬真係搵好多人嚟評，香港行荷李活個套，你可以班馬搵人填夠咪得囉，大包圍票多就贏。你唔好理，台灣細片反而有機會，評審經過一輪討論去判獎，唔似香港嗰種較工業，喺華人世界金馬獎算係嚴謹。」他指近年因為首部劇情片計劃，加上學院派導演湧現，令金像獎中多了非主流片入圍及獲獎。
《香港製造》為「九七三部曲」的第一部，在金馬獎之前，陳果憑該片在歐洲贏過法國南特電影節最佳電影、瑞士洛迦諾影展歐洲藝術影院聯盟大獎，特別是南特影展重要性僅次於康城、威尼斯同柏林三大影展。陳果表示「影展毒」比「拍戲毒」更毒，他笑說︰「拍戲係搵食，攞獎唔係。好在當年金馬前去過歐洲影展，去到金馬至冇咁驚。」攞獎重要但電影的影響亦好緊要，他反問︰「你知唔知《香港製造》到而家都仲好『熱鬧』，呢20年我都未得閒過，久唔久香港回歸10周年放一次，20周年又放一次，所有影展都請你參加。香港地位喺國際好特別，而家更加特別啦，變成咁嘅時候，（影展）嗰班人睇以後再冇《香港製造》......」陳果自言每趟重複以前所講有點悶，所以已婉拒不少邀請。他指不少老牌香港導演都傾向合拍片，而近年湧現的年輕導演，傾向社會議題電影，令非主流電影在金像獎中多了獲獎機會。
最佳導演
蔡明亮《日子》
陳玉勳《消失的情人節》
黃信堯《同學麥娜絲》
鄭有傑《親愛的房客》
陳果《墮胎師》
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
