私影模出身、29歲的袁晴晴（CoCo）入行11年，但相信不會有太多人記得，她最近參加ViuTV《全民造星III》成為話題女王，一出場便被監製花姐（黃慧君）篤爆「扮喊」，人前人後兩個樣，靠負面新聞博上位。
成為「退選五戰士」的CoCo被不少網上花生友狠批：「樣X衰到」、「哪裏來的自信」、「個下巴錐形嘅」、「好似李偲嫣」等極盡難聽說話，難得CoCo的EQ高，淡淡然說：「呢個係真人騷，我知道自己無時無刻都被影住，好多位佢哋cut咗，係為節目效果。」在台上被問會否退選，Coco是第一個舉手肯定答「唔會」！她解釋：「我係佢哋揀入嚟，我退咪自打嘴巴？除非評判叫我走，咁我唔會賴死。」
CoCo的下場，最終都是首輪被foul出局，但她的經歷或許是眾多發明星夢的女仔其中一個。出身草根階層，住公屋，單親家庭長大，與媽媽和弟弟相依為命，盼望一天飛黃騰達，「細個好勤力讀書，我會考有25分，中六、七自修升讀大學，我對自己要求係想拔尖入大學，但最後只考入中大神學系，有啲失望，所以冇讀，我唔想為一張沙紙讀書。我好想畀好啲生活屋企人，出嚟打份工幾萬蚊，有啲浪費我青春，我覺得自己值得搵更多。」好奇問，怎樣可以搵更多？她說：「我知一啲勞動性嘅工作係唔啱我做，因為我有智慧，或幫人補習、教琴，總之我心態係使咗先，但都搵得返，我都係使自己錢。」
CoCo選擇放棄升讀大學，轉去高級文憑讀音樂，經師姐介紹做活動司儀及私照，半隻腳踏入娛樂圈，始知搵食艱難，「我都有拍過吓戲，做男主角身邊性感女伴，有近鏡好開心，800至1,000蚊拍足12個鐘。」為生計，畢業後CoCo做空姐，但工作1年9個月便離職，原因是：「我鍾意去旅行多過serve人，鍾意做台上焦點。」
過去CoCo參加好多不同類型的選美比賽，包括澳門亞洲車模、深港澳超級車模、環球國際小姐中國賽區香港代表等等。至2014年底，CoCo與自稱餐廳老闆的男子見面期間，拎走對方手機，盜竊罪成被判感化令一年及賠償手機，她直認拜金：「有啲年少無知，又有啲拜金，男仔追你送個袋，其實等於幾個月收入。我心態係又冇出賣自己身體，純粹追求送個袋畀我之嘛。」她咬牙切齒表示自己從沒有做過援交，「讀書時同學已經覺得我係，早幾年會唔開心，女仔始終介意，但難聽啲講，你幫襯過我咪出嚟講，或拎相出嚟做證據，呢行有做過有個價，起碼我唔係on list！」
CoCo自言潔身自愛，因為不想對不起幾年前過世的媽媽，她哽咽地說：「我嫁人都要身家清白，唔好對唔住媽咪。嗰件事（偷竊）已經愧疚佢，現在媽咪離開咗，唔係細佬我都跟媽咪走咗......因為單親家庭長大，感情太深，現在得我同細佬相依為命，人生冇咩輸，所以細佬好重要。」近年CoCo轉型做生意，在旺角開奶茶舖，細佬負責看舖，由朝做到晚，在細佬眼中家姐好顧家，對於別人的惡言，只覺得：「你根本唔認識佢。」
對於被標籤做「極品港女」、「公主病」，CoCo不承認：「好多人唔信，我唔煙唔酒唔蒲，唔覺自己有公主病，因為我冇公主命。」她表示沒有整容，只是執相放上社交網自娛，「我只係做一啲香港女仔鍾意做嘅嘢，P唔P都俾人話，唔爭在，人哋影得我唔靚，我沉醉自己P圖世界，真人我冇整過，冇做傷天害理嘅事ok啦。話我被人包，但其實我永遠唔會坐頭等飛機，每次去旅行帶多幾套泳衣，自己拎腳架自拍，營造一個公主生活，人哋點講由得人，我覺得自己係一個好女仔，力爭上游搵錢買花戴。」沒有放棄追夢，CoCo仍盼商界、演藝雙線發展，行自己的路。
採訪：嵐山
攝影：沈健程
攝錄：馮嘉銘
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
