患難見真情，疫下見人心！這兩年香港變得頗陌生，引以為傲的自由空氣，一向以自由為榮的香港人，現在變得動不動就下跪，可能隨着年紀有家擔，骨質變得「疏鬆」。看着那些為人仔，雙膝「跪地」表忠的藝人，每次以「阿叻流」對答，以「我唔知、我唔理、我冇聽過…」座右銘做人，貴為影帝視后級等人紛紛在大陸抖音hit爆拍片化身劉馬車，為網民所不齒。
近日見周柏豪在社交網貼文表忠跪玻璃跪到「見紅」，只求庇蔭過上健康和順的日子，結果表忠論兩邊不討好，揚言「比比鳥不了」，代言廠商悄悄刪走廣告照避風頭。
周柏豪仍然遭小粉紅狙擊，昨日又出新招，找來Blue Blood界陳百祥加持，到親中網媒訪問接受訪問，周柏豪再次表忠，一時聲稱通關後要返大陸尋回家鄉感，一時又感激身為中國人，澄清大家對他的政治立場有所誤解，他自從迎接女兒出世，要發揮「正能量」。
周柏豪講起疫情下經歷最困難的日子，要擔心生活上家人是否安全，整個社會因疫情影響，好似要重新適應生活，陳百祥指香港控制疫情較差，暫時無法達到國家一般城市的標準。問到周柏豪如何看國家這10年來的進展，周柏豪瞪大眼說：「發展好快，去到一啲城市基建讓我大開眼界，所有嘢都好方便，場館好犀利，所有事情做得好好，我會覺得（以國家為榮）當然」
周柏豪笑笑口打溫情牌決定通關後要返家鄉認親認戚：「通關之後，我最想去內地探我啲親和朋友，因為冇見好耐，疫情同之前都忙拍劇，做其他宣傳，好耐冇去搵返自己啲親戚，我自己係東莞，我媽咪嗰邊，雖然我演唱會都有去，但永遠都係直接去現場，佢哋都有嚟睇，但係係去後台影一張相，然後就要走，我好忙，咁通關之後，好想搵返啲親戚，見吓問候吓。我表妹都生咗小朋友，我連我後一輩都未見過，利是都未派！」
提到女兒出世，周柏豪心態有何改變，周柏豪：「我個心態覺得負擔大咗，但我好樂意去承擔呢個責任，因為望住下一代成長，灌輸一啲正確價值觀畀佢哋，我覺得身為父母好重要，呢一年睇住囡囡由只識得喊，到自己拎住個奶樽，自己飲嘢，其實冇人教過佢向上啲奶就會倒落去，呢啲冇人教過佢。」連陳百祥忍不住寸佢：「乜咁聰明!」周柏豪亦尷尬說：「呢啲係本能，去年家人身體唔舒服，突然間屋企有一個小天使嚟到，更多正能量，所以做咗爸之後更開心，搵到人生正確嘅目標應該做乜嘢。」
陳百祥指最近有一件小事發生在周柏豪身上，落力為周柏豪平反，「我識你好耐，睇到你喺香港嘅一言一行，我覺得你同我冇分別」，周柏豪晒出一副鵪鶉樣，一邊低頭向下望一邊說：「前幾日我post一段我自己嘅感受出嚟，引起一啲迴響，但係我自己嘅睇法係我爺爺嫲嫲、外公外婆都喺內地，之前走落嚟香港，我自己係一個中國人，我只係講出自己嘅感受，但係引嚟好大嘅反應，但呢個係一個自由社會，表達自己嘅感受，之前大家可能對我有啲誤解，喺一啲政治取向，我做藝人，我只係想唱好自己嘅歌，帶娛樂畀觀眾，但過往日子令到大家唔開心，大家嘅反應亦令到我唔識得去處理，坦白講以前返學，冇人會教我，所謂嘅危機處理，我自己遇到一啲驚嘅事，我會好想去匿埋，乜都唔理、乜都唔解決，希望可以令到件事慢慢變淡，原來呢個年代係唔可以，呢個年代係要勇於表達自己嘅感受，令到大家知道我想以咩姿態，繼續喺幕前跟大家見面。」
陳百祥稱「唔表態唔代表佢係邊一面，你哋所講嘅黃同藍，係你自己定。」他們認同香港目前有自由，不明白為何他們會有訴求，思想不同就不代表要跟隨，周柏豪在旁邊不斷點頭。陳百祥又鼓勵周柏豪：「現在我哋冇咩威脅，嗰時就好多人話你。我同你一樣，不過我忍唔到，我出嚟講咗我心中嘅說話，我就想聽吓你內心嘅感覺。譬如話你同黃之鋒影過相，原來誤會係佢去後台，可能係fans之類。」周柏豪強調這一張合照是2014年在紅館後台影的，因為香港演唱會文化有一些人會帶朋友到後台影相，混亂中同事安排逐一影合照，他身為歌手，他就算知道對方是甚麼人，也不會拒絕與他們合照，「2014年，坦白講我唔認識佢」，這是一個很大的誤會，陳百祥更拍拍周柏豪膊頭稱而家沒問題。
周柏豪一邊聽一邊落力點頭：「我當然唔同意佢嘅做法，搵其他國家嘅人嚟制裁，對呀!自己同阿媽嘈交，冇理由搵隔離屋個師奶嚟打自己個阿媽嘛！」陳百祥亦讚他：「幾好畀例（比喻） !」周柏豪露出誠懇眼神：「點都係自己同阿媽傾好佢，咁本身都要聽阿媽話，呢個『孝順』，我係一定要提出，所以係完全唔同意佢嘅理念同做法。呢個係我立場，同埋我完全反對暴力行為，我係好怕見到，我係好驚。我係好怕見到啲片。」
講到時下年輕人，周柏豪七情上面地說可能他們未必了解中國大陸，太多不了解才會產生誤解，需要時間去讓他們明白香港以外的地方，已經不斷默默耕耘做自己的事，而不會自己搞亂自己。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
