2021年1月18日星期一

【頭條獨家】四中佬開咪做新城晚間節目林子博為聽眾解困帶出正能量 #林子博

四中佬開咪做新城晚間節目林子博為聽眾解困帶出正能量

林子博首次挑戰做DJ，跟(左起)Henry、Colun、阿范全男班合作。

踏入新嘅一年，單親爸爸林子博要重新振作。於1月1日，逢周一至五晚11時開始，林子博(Bob)跟范振鋒(Ricky)、張顥霖(Henry)及黎奕倫(Colun)為新城電台主持兩小時新節目《Bibibala開大喇叭》，模式如同9年前由阿范、杜浚斌、阿Bob(林盛斌)、Sam嘅phone-in節目《新香蕉俱樂部》一樣，子博大笑說：「我都係Bob Lam，希望將來有佢咁嘅成就！」採訪：方騫平

(左起)Henry、Colun、阿范、子博齊齊為新城主持夜間節目《Bibibala開大喇叭》，解決聽眾的感情及其他煩惱。

雖然林子博和生意人張顥霖都係處男下海做DJ，但有Ricky及Colun帶住，做得相當流暢，惟一係最初唔太知運作流程，有待摸索。子博對個人表現相當滿意，「我把聲辦識度高，一出聲都變得幾有氣氛。做主持同做DJ有啲唔同，做DJ冇咁多框框，鍾意講乜就講乜，話題闊啲。」

9年前許志安都做過《新香蕉俱樂部》嘉賓，接受主持人阿Bob、阿Ben及阿范訪問。

提到首集phone-in聽眾好爆，其中有位女聽眾話，新年願望最想離婚，最不滿老公要求她洗底褲。至於另一位女聽眾因為胸大，經常被朋友性騷擾。子博冇被嚇窒，還教巨胸女聽眾要嚴肅對待，必要時應該報警。他又爆以前喺電視台（亞視）做主持經歷，「某次男助導趁住我同一位上圍豐滿嘅女主持人傾談時，行來行去借意碰撞，女主持忍無可忍，喺製作部當住眾人前斥責PA話『點呀？彈唔彈手呀？』呢招勁呀！PA嚇到走都走唔切。」至於阿范話舊節目咁受歡迎，所以搵埋兄弟一齊做，但阿Bob去咗電視台，上咗岸好忙，不便打搞他。Colun笑言節目中大談感情問題，咁要搵「情聖」Henry喇！Henry尷尷尬尬話：「我結婚前都拍過幾次拖，有少少經驗啫！」子博希望透過節目發放正能量：「我都係一個人辦，我都可以過得到，應該產生鼓勵作用。」