「話題女王」馮盈盈與江嘉敏去年因出席富豪船P令關係決裂，早兩日東網率先踢爆佢哋被無綫點名要拍檔做主持，焗住破冰，今日2人已極速為節目《解構心機女》開工，更世紀合照添！
大晒心機事業線嘅馮盈盈，大方「萬歲」請眾人飲嘢，更細心為江嘉敏預備一杯少甜走冰嘅珍珠奶茶，賀佢第1次喺TVB做主持，對昔日閨蜜依然照顧有加，明顯有心同對方重修舊好，一開拍就示好加油打氣，仲話要一齊做好個騷。江嘉敏亦表現受落，仲難得肯答應同馮盈盈世紀合照，似乎二人今次可以合作愉快啵。而馮盈盈好大方喺社交網發文自抽佢哋「破冰」呢件事：「破。冰……sorry打錯，走冰先啱，珍珠奶茶少甜走冰，知道嘉敏今日第一次做主持，請你飲珍珠奶茶，為你加油打氣💪🏻我哋一齊做好個show😉」。
馮盈盈受訪時表示：「知道嘉敏第一次做主持，難免會因為冇經驗而緊張，所以請佢飲珍珠奶茶，希望佢可以唔好太緊張，為佢加油打氣，而我喺主持方面經驗比佢豐富，如果佢有咩問題，都歡迎佢隨時問我，我定會樂意解答，跟佢分享我心得。」
佢又話傾到心機女戀愛約會技巧：「我就可能要向嘉敏請教才對，佢係幾位女主持中唯一拍緊拖，平時睇佢同男朋友Anthony喺社交平台上嘅高調放閃，就知Anthony對佢幾好，嘉敏亦治得男友貼貼服服，無論經歷幾大嘅難關同風浪，佢哋兩個嘅感情都仲保持到，當中嘅秘技係咩，我期待嘉敏喺節目中同我哋各位好姊妹大方分享。」
來源 source: http://hk.on.cc
|
鍾意就快D Share啦！
|
|
|
