藝人陳智燊（Jason）及太太宋熙年（Sarah）自離巢後轉做KOL，經常將日常生活拍片放上網分享，宋熙年早前為Jason再誕下一子，隨着一對仔仔愈嚟愈大空間就要愈來愈多，而近年KOL事業發展得唔錯嘅兩人，就決定細屋搬大屋，等兩個仔仔住得舒適！佢哋仲將今次搬屋過程拍片公開，同網友分享點樣先搬得輕鬆啲！
Sarah一開始就稱讚自己叫Jason買咗部卡板車非常精明，只需要200蚊，輕輕鬆鬆就將好似人咁高嘅雜物搬到停車場上車，Jason貫徹好男人作風，全程做搬運工，而Sarah只負責揸機拍攝，期間Jason童心未泯坐上卡板車滑來滑去，認真可愛！兩人都解釋番點解唔搵搬運公司，原因係呢啲雜物都屬於兩個仔仔嘅，佢哋想安頓好先，然後再搵搬運公司搬自己嘢，認真廿四孝父母！
到入到屋嗰刻，睇得出算係中高上住宅，門口已經有個超大型鞋櫃，不過Sarah就嫌鞋櫃櫳太深難搵鞋。然後佢哋就帶大家參觀廚房，廚房都有成300呎，兩公婆一齊煮飯仔拍埋片都冇問題！鏡頭一轉，又到Jason抹櫃，原來當時已經係凌晨2點喇，不過Sarah一路都陪住佢，仲鼓勵老公聽日繼續！
陳智燊接受東網訪問時，透露新居面積比舊居大兩成，再加上租金差不多，所以決定搬新居轉換環境，談到他於片中指新居廚房達300呎，Jason笑說：「我講笑啫!不過睇樓時已經畀個咁寬敞嘅廚房吸引到，目測有10呎乘10呎，都有幻想好似啲外國劇集咁，煮完喺旁邊個Bar枱度食嘢，但太太（宋熙年）就取笑我唔會下廚，呢個係真嘅，平時多數都係佢煮。」由於搬屋收拾了數十箱物件，笑言來回搬運花了一星期，再加上執屋整整一個月，非常忙碌：「依家有兩個小朋友，所以要搞掂佢哋個房先。」
來源 source: http://hk.on.cc
|
鍾意就快D Share啦！
|
|
|
